राष्ट्रवादी हा भरवशाचा पक्ष नाही, एकवेळ काँग्रेस परवडला : चंद्रकांत पाटील

सोलापूर : राष्ट्रवादी काँग्रेस हा भरवशाचा पक्ष नाही. सकाळी एक आणि रात्री एक राजकारण करणारा हा पक्ष आहे. कॉंग्रेस एक वेळ परवडला, कॉंग्रेसमधील बहुतांश नेते वेलकल्चर आहेत, हे दरोडेखोर नसतात. राष्ट्रवादीच्या सलगी करण्याच्या डावाला भाजप कधीही भूलणार नाही, असे वक्तव्य भारतीय जनता पक्षाचे प्रदेशाध्यक्ष चंद्रकांत पाटील यांनी केले. (NCP is not a credible party : Chandrakant Patil)

आमदार पाटील हे आज सोलापूरच्या दौऱ्यावर होते. एसटी कर्मचाऱ्यांच्या आंदोलनस्थळी भेट दिल्यानंतर ते माध्यमांशी बोलत होते. त्यावेळी सांगलीतील काँग्रेसचा गड नेस्तनाबूत करण्यासाठी राष्ट्रवादी भाजपशी सलगी करत आहे, या प्रश्नावर पाटील यांनी वरील उत्तर दिले.

एसटी कर्मचाऱ्यांचा आंदोलनात भाजप सहभागी होणार आहे. आतापर्यंत राज्यात 27 कर्मचाऱ्यांच्या आत्महत्या झाल्या आहेत. पण, हे सरकार गेंड्यांच्या कातडीचे आहे, असा आरोपही चंद्रकांतदादांनी या वेळी केला.

प्रदेशाध्यक्ष पाटील म्हणाले की, या सरकारने आधी सचिन वाझेचे समर्थन केले, त्यानंतर वाझे, परमवीरसिंह आणि आता वानखेडे हे भारतीय जनता पक्षाचे पोपट आहेत, असे म्हटले जात आहे. उद्या हे हायकोर्टला भाजपचा पोपट म्हणतील कारण हायकोर्टाने जामीन दिला नाही. बाबासाहेब आंबेडकर यांनी लिहिलेली घटना सरकारला मान्य नाही, त्यामुळे त्यांनी आरोप करावा की वानखेडे हा भाजपचा पोपट आहे.

केंद्र सरकार अधिकाऱ्याच्या माध्यमातून वसुली करत आहे, या आरोपावर चंद्रकांत पाटील म्हणाले की, राज्य सरकारने वेगवेगळ्या विभागाच्या माध्यमातून गेल्या दोन वर्षांत वसुली केली आहे. आताच एका मंत्र्यांच्या जावयाला मिळालेले 1500 कोटींचे कंत्राट रद्द करावे लागले, हे माजी खासदार किरीट सोमया आणि भाजपचे यश आहे. एसटी कर्मचाऱ्यांना 500 कोटी रुपये दिले असते, तर हे कर्मचारी खूष होऊन दिवाळीसाठी घरी गेले असते. शेतकरी अडचणीत आहेत. पण या सरकारला कोणाचेच काही पडलेले नाही.