APMC Result : वाईत मकरंद आबांचाच करिष्मा; विरोधकांना धोबीपछाड...

-भद्रेश भाटे

Wai APMC Result : वाई बाजार समितीच्या निवडणूकीत आमदार मकरंद पाटील Makrand Patil यांच्या नेतृत्वाखालील राष्ट्रवादी काँग्रेस NCP पुरस्कृत सत्तारूढ सहकार प्रगती पॅनेलने सर्व ११ जागा जिंकून निर्विवाद वर्चस्व प्रस्थापित केले. सर्व उमेदवार ५०० ते ६०० मतांच्या मताधिक्याने विजयी झाले. विरोधी शेतकरी परिवर्तन पॅनेलला एकही जागा मिळाली नाही. यापूर्वी सात सदस्य बिनविरोध निवडून आले आहेत. यामध्ये सत्तारूढचे सहा व विरोधकांचा एका सदस्याचा समावेश आहे.

बाजार समितीच्या निवडणुकीसाठी रविवारी (ता.३०) ९०.५७ टक्के मतदान झाले होते. आज सकाळी दहा वाजता बाजार समितीच्या शेतकरी सभागृहात निवडणूक निर्णय अधिकारी सहायक निबंधक श्री.जी. टी. खामकर यांच्या मार्गदर्शनाखाली मतमोजणी सुरू झाली. यावेळी निवडणूक निरीक्षक प्रभारी तहसीलदार वैशाली जायगुडे - घोरपडे, सहायक निवडणूक अधिकारी चंद्रशेखर भुजबळ यांची प्रमुख उपस्थिती होती.

पाच टेबलवर एक पर्यवेक्षक, एक रो ऑफिसर व तीन सहाय्यक यांनी मताची मोजणी केली. सुरवातीला संस्था, ग्रामपंचायत त्यानंतर व्यापारी मतदार संघाची मतमोजणी झाली. निकाल जाहीर होताच बाजार समितीच्या प्रवेशद्वारावर राष्ट्रवादी काँग्रेसच्या NCP कार्यकर्त्यांनी फटाक्याची आतषबाजी व गुलालाची उधळण करीत जल्लोष साजरा केला. तालुका अध्यक्ष प्रमोद शिंदे, प्रदेश सरचिटणीस प्रताप पवार यांनी सर्व विजयी उमेदवाराचे अभिनंदन केले.

राष्ट्रवादी काँग्रेस पुरस्कृत सहकार प्रगती पॅनेलचे विजयी उमेदवार या प्रमाणे (कंसात मते) :- सहकारी संस्था (सोसायटी) सर्वसाधारण मतदार संघ:-(सात जागा)- केशव शंकर गाढवे (६२४). रमेश व्यंकटेश गायकवाड (६१९). पोपट गणपत जगताप (६२१). मोहन सर्जेराव जाधव ( ६१४). राहुल मधुकर डेरे (६२३). रवींद्र संपत मांढरे (६१३). विनायक प्रभाकर येवले (६१५)

ग्रामपंचायत (सर्वसाधारण) मतदार संघ:- (दोन जागा) - तानाजी बरमाराम कचरे (६४९) व दत्तात्रय शिवाजीराव बांदल (६२४). व्यापारी मतदारसंघ (दोन जागा) तुकाराम रघुनाथ जेधे (४७३) व नानासाो गणपतराव शिंदे (४६६). दरम्यान बाजार समितीत महिला राखीव मधून श्रीमती शशिकला चंद्रकांत सावंत, सौ. संगीता शंकर भणगे, भटक्या जाती जमाती मधून राहुल साळू वळकुंडे.

नागरिकांचा इतर मागास प्रवर्ग मधून संजय बंडू मोहोळकर, हमाल - मापाडी मधून सचिन भानुदास फरांदे, अनुसूचित जाती जमाती राखीव मधून अशोक सावळाराम सोनवणे, तर आर्थिक दुर्बल घटक गटातून विवेक भोसले हे सात सदस्य यापूर्वी बिनविरोध निवडून आले आहेत.

विरोधी शेतकरी परिवर्तन पॅनलचे पराभूत उमेदवार - संस्था मतदार संघ - मेघराज शिंदे (६४), रमेश वाडकर (६४). ग्रामपंचायत मतदार संघ -संतोष विलास शिंदे (१०९ अपक्ष). व्यापारी मतदार संघ : नितीन तरटे. (१६४), रवींद्र भिलारे (११९).