प्रतिज्ञापत्रातून व्यक्त करावी लागत आहे शिवसैनिकांना निष्ठा

पुणे - राज्यात शिवसेनेचे दोन गट निर्माण झाले आहेत. यात मुख्यमंत्री एकनाथ शिंदे ( Eknath Shinde ) यांच्या गटात जाणाऱ्यांची संख्या दिवसेंदिवस वाढत आहे. अशातच शिवसेना व शिंदे गट यांच्याकडून शिवसैनिकांकडून प्रतिज्ञापत्र लिहून घेण्याची जणू चढाओढ सुरू झाली आहे. राज्यात अशा प्रतिज्ञापत्रांचे पेव फुटले आहे. Shivsena News Update

नेते, कार्यकर्ते व पदाधिकारी आपल्याच बरोबर रहावेत यासाठी दोन्ही गट प्रयत्न करताना दिसत आहेत. यातच आता शिवसेना कार्यकर्त्यांकडून 100 रुपयांच्या बॉण्डवर प्रतिज्ञापत्रच लिहून घेतले जात आहे. यवतमाळमध्ये शिवसेना बंडखोर आमदार संजय राठोड यांच्या कार्यालयात असे प्रतिक्षापत्रे लिहून घेतली जात आहेत.

जळगावमध्ये शिवसैनिकांकडून प्रतिज्ञापत्र लिहून घेतले जात आहे. शिवसेना प्रमुख उद्धव ठाकरे यांच्या सांगण्यानुसार हे प्रतिज्ञापत्र लिहून घेतले जात असल्याचे सांगितले जात आहे.

त्यामुळे एककाळ निष्ठावान कार्यकर्त्याचा पक्ष म्हणून मानला जात असलेल्या शिवसेनेतच निष्ठा प्रतिज्ञापत्रावर व्यक्त करावी लागत असल्याची खंत सर्वसामान्य शिवसैनिक व्यक्त करत आहेत. शिवसेनेची राज्यात झालेली ही फुट राजकीय चर्चेचा विषय ठरत आहे.