गोरे, जानकरांना धक्का; देवापूर-पळसावडे सोसायटीत राष्ट्रवादी, काँग्रेसची सत्ता...

म्हसवड : देवापूर (ता. माण) येथील देवापूर - पळसावडे विविध कार्यकारी सेवा सोसायटीच्या निवडणुकीत राष्ट्रवादी काँग्रेस व काँग्रेस आघाडीच्या श्री शंभू महादेव परिवर्तन पॅनेलने भाजपचे जिल्हाध्यक्ष व माण-खटावचे आमदार जयकुमार गोरे व माजी मंत्री, आमदार महादेव जानकर यांच्या शंभू महादेव पॅनेलनचा १२-१ असा पराभव धुव्वा उडवून दिला आणि विजयश्री खेचून आणली आहे. या सोसायटीत तब्बल पंधरा वर्षांनंतर सत्तांतर घडले आहे.

माणच्या पूर्व भागात देवापूरच्या विकास सोसायटी निवडणुकीकडे संपूर्ण तालुक्याचे लक्ष लागले होते. कोणत्याही स्थितीत सत्ता कायम ठेवणार असा विश्वास बाळगून सत्ताधारी व आमदार जयकुमार गोरे व आमदार महादेवराव जानकर यांचे कार्यकर्ते हे शंभू महादेव पॅनेलच्या माध्यमातून निवडणूक लढवत होते. तर, राष्ट्रवादी व काँग्रेस आघाडीच्या श्री शंभू महादेव परिवर्तन पॅनेलच्या माध्यमातून समविचारी एकत्र आले होते.

देवापूर व पळसावडे कार्यक्षेत्र असलेल्या या सोसायटीसाठी दोन्ही पॅनेलने प्रत्येक मतदारांपर्यंत पोचून प्रचार केला. ८३० मतदानापैकी ७६५ मतदान झाले. विकासासाठी एकत्र आलेल्या राष्ट्रवादी व काँग्रेस कार्यकर्त्यांनी शिस्तबद्ध प्रचार करत सत्तांतर घडविले. निकालानंतर कार्यकत्यांनी जल्लोष केला. श्री शंभू महादेव परिवर्तन पॅनेलचे विजयी उमेदवार : रावसाहेब बाबर, ज्ञानदेव काळे, सिध्दनाथ जाधव, भास्कर बाबर, मधुकर कांबळे, पांडुरंग पिसाळ, मारुती यादव, सौ. मंगल बाबर, सौ. लक्ष्मी जाधव, सुनिल क्षीरसागर, बबन जाधव, आगतराव बनसोडे तर विरोधी पॅनेलचे उत्तम बाबर हे एकमेव उमेदवार निवडून आले आहेत.

ही निवडणूक यशस्वी करण्यासाठी सरपंच शहाजी बाबर, उपसरपंच मंगल चव्हाण, शेती सोसायटी अध्यक्ष जगन्नाथ माने , किरण बाबर, आनंदा बाबर, रामदास बाबर, पै. विशाल जाधव, बाबासाहेब बनसोडे, नितीन चव्हाण, अशोक बनसोडे, सुनिल बाबर, सुहास चव्हाण, शांताराम जाधव, सागर काळे, सर्जेराव व्हरकाटे, सयाजी जानकर, शिवाजी यादव, तात्यासो औताडे कुंडलिक यादव, भागवत सरतापे, मधुकर चव्हाण, पांडुरंग यादव, बंडू शेंडगे, सुरेश दादासो बाबर आदींनी परिश्रम घेतले.