सांगली : निवडणुकीत टोकाचे आरोप झाले की, वातावरण ताणले तरी निकालानंतर सारे प्रवाह एकरुप झाले पाहिजेत, अशी भाषणबाजी सगळीकडे पहायला मिळते. सांगली येथील खणभागातील वेगवेगळ्या विचार प्रवाहांना मानणाऱ्या कार्यकर्त्यांनी मात्र वास्तवात नुकतेच ते करून दाखवले. सांगली महापालिकेच्या प्रभाग १६ च्या निवडणुकीत पराभूत झालेल्या भाजपच्या (bjp) अमोल गवळी यांनी काँग्रेसचे (congress) विजयी नगरसेवक तौफिक शिकलदार यांच्या घरी जाऊन त्यांचा सत्कार केला. भाजपचे प्रदेश उपाध्यक्ष पृथ्वीराज पवार यांच्या पुढाकाराने खणभागातील जिव्हाळ्याचा झरा पुन्हा एकदा खळाळून वाहता झाला. (In Sangli defeated BJP candidate went home and felicitated winning Congress candidate)
दरम्यान, सांगलीच्या विधानसभेच्या १९८६ मधील पोटनिवडणुकीत संभाजी पवार यांनी विष्णूअण्णा पाटील यांचा पराभव केला होता. त्यावेळी अण्णांनी राजवाडा चौकात जाऊन संभाजी पवार यांना हार घातला होता. त्या घटनेची आजच्या सत्काराच्या निमित्ताने आठवण आली आणि तीच परंपरा सांगलीच्या राजकारणात पुढे चालू राहील, असा विश्‍वासही व्यक्त झाला.
सांगलीचा खणभाग म्हणजे एक गाव, खेडे आहे. या भागात अनेक कुटुंबे वर्षानुवर्षे गुण्यागोविंदाने नांदत आली आहेत. हिंदू-मुस्लिम ऐक्याचे पूल येथे बांधले गेले आहेत. निवडणुकीत थोडा ताण निघतो, वाद होतात, चर्चा होते, स्पिरीट बाहेर येते. मात्र, मतदान संपले, निकाल लागला की पुन्हा गळ्यात गळे घालून लोक वाट तुडवू लागतात.
या बाबत भाजपचे पृथ्वीराज पवार म्हणाले की, ‘‘खणभागच काय तर सांगली जिल्ह्याची ही परंपरा आहे. राजकारणातून धार्मिक किंवा सामाजिक वितुष्ट निर्माण व्हावे, हे आम्हाला नको आहे. हा विकासाचा प्रवाह आहे आणि तो सतत खळखळ, आनंदाने वाहता राहिला पाहिजे. अमोल गवळी आणि मी तौफिक यांचा सत्कार आणि अभिनंदन करण्यामागे तोच विचार होता.’’
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
