अशोक कारखाना निवडणुकीत सासरा विरुद्ध सून असा सामना रंगणार

बापूसाहेब कोकणे

टाकळीभान ( जि. अहमदनगर ) : श्रीरामपूर तालुक्यातील अशोक नगर येथे असलेल्या अशोक सहकारी साखर कारखान्याची निवडणूक प्रक्रिया सुरू झाली आहे. या निवडणुकीत माजी आमदार भानुदास मुरकुटे यांची प्रतिष्ठा पणाला लागली आहे. In Ashok Sugar Factory election, a match will be played between Father-in-law and daughter-in-law

अशोक सहकारी साखर कारखाना संचालक मंडळाच्या निवडणुकीसाठी माजी आमदार भानुदास मुरकुटे यांनी लोकसेवा मंडळाकडून, तर त्यांच्या स्नुषा पंचायत समितीच्या सभापती डॉ. वंदना मुरकुटे यांनी शेतकरी संघटनेकडून टाकळीभान गटातून सर्वसाधारण मतदारसंघातून उमेदवारी अर्ज दाखल केले आहेत. त्यामुळे सासरा विरुद्ध सून अशा लढतीची शक्यता राजकीय विश्‍लेषक वर्तवत आहेत.

टाकळीभान, भोकर, कमालपूर, घुमनदेव, घोगरगाव, बेलपिंपळगाव अशी सहा गावे असलेल्या गटात दोन हजार 597 सभासद मतदानाचा हक्क बजावणार आहेत. सन 1987 ते आजतागायत माजी आमदार मुरकुटे हे टाकळीभान गटातून निवडणूक लढवीत एक हाती कारखान्याचे प्रतिनिधित्व करीत आहे. डॉ. वंदना मुरकुटे यांनी गेल्या निवडणुकीत पंचायत समितीच्या टाकळीभान गणातून एक हजार 250 मताधिक्याने विजयी होऊन भानुदास मुरकुटे यांना धक्का दिला होता.

आता अशोकच्या निवडणुकीत त्यांच्या उमेदवारीने मोठी चुरस निर्माण होणार आहे, अशा चर्चेला आतापासूनच उधाण आले आहे. दोन्ही मुरकुटे एकमेकासमोर उभे ठाकतात की नाही, हे पाहण्यासाठी चार जानेवारी पर्यंत वाट पाहावी लागणार आहे.

डॉ. वंदना मुरकुटे यांनी महिला राखीव, ओबीसी व सर्वसाधारण मतदारसंघ, असे तीन उमेदवारी अर्ज दाखल केलेले आहेत. त्यांनी टाकळीभान गटातूनच सर्वसाधारण जागेसाठी उमेदवारी करावी, अशी मागणी काँग्रेसचे जिल्हा उपाध्यक्ष कार्लस साठे व तालुका उपाध्यक्ष राजेंद्र कोकणे यांनी केली आहे.