हिंमत असेल तर 'ईडी'ने माझ्याकडे यावे; सर्वांची यादी देतो : उदयनराजे

सातारा : यांनी त्यांचे झाकायचे, त्यांनी यांचे झाकायचे, बस्स झाले सगळ्यांचे. सोयीचे राजकारण सध्या चालले आहे. आपण जे पेरतो तसं उगवतं. का माझ्या मागे ईडी नाही. ईडीला हिंमत असेल तर माझ्याकडे यावे, त्यांना मी सर्वांची पुराव्यासह यादी देतो. कोणी कुठल्याही पक्षातील असू देत, माझ्याकडे सगळ्यांची माहिती आहे, असा गौप्यस्फोट खासदार उदयनराजे भोसले यांनी प्रतापगडावरून केला आहे.

विजयादशमीच्या पार्श्वभूमीवर आज खासदार उदयनराजे भोसले हे प्रतापगडावर भवानी मातेच्या दर्शन व आरती करण्यासाठी गेले होते. यावेळी त्यांच्याशी पत्रकारांनी संवाद साधला. सध्या सुरू असलेल्या ईडीच्या कारवाईंविषयी विचारले असता उदयनराजे म्हणाले, ''आपण जसे पेरतो तसं उगवतं. का आमच्या मागे ईडी नाही. ज्यांनी काहीच वाईट केलेलं नाही, त्यांच्या मागे का ईडी नाही. यादी देईन पुराव्या सकट. ईडीला हिंमत असेल तर माझ्याकडे यावे. त्यांना मी सर्वांची पुराव्यासह यादी देतो. कोणीही आणि कुठल्याही पक्षातील असु देत, सगळ्यांची यादी देतो. माझ्याकडे सगळ्यांची माहिती आहे.''

हे सर्व भाजपकडून चालले आहे का, या प्रश्नावर ते म्हणाले, सध्या एकच चाललंय त्यांनी यांचे झाकायचे, यांनी त्यांचे झाकायचे. सोयीचे राजकारण सुरू आहे. तुमच्यावर तुमच्याच पक्षातील नेते व आमदार आरोप करत आहेत, यावर उदयनराजे म्हणाले, चांगले आहे ना, मला दृष्ट लागू नये, म्हणून ही त्यांची भावना असेल. कारण मी चांगले काम करत आहे. मला दृष्ट लागू नये, म्हणून असे काही तरी केले पाहिजे, असे त्यांना वाटत असेल. म्हणून ते माझ्यावर आरोप करत आहेत. हिंमत असेल तर त्यांनी समोरा समोर येऊन आरोप करावे, असे आव्हान त्यांनी आमदार शिवेंद्रसिंहराजेंना पुन्हा दिले आहे.