हसन मुश्रीफांनी घेतल्या चक्क दोन म्हशी..

Hasan Mushrif : गोकुळ दूध संघाच्या म्हैशीच्या दुधाला मुंबई, पुणेत मोठी मागणी आहे त्यामुळे गोकुळच्या वतीनं शेतकऱ्यांनी म्हशीच दूध उत्पादन वाढवावं यासाठी प्रयत्न सुरू आहेत. शेतकऱ्यांना प्रोत्साहन मिळावं म्हणून राष्ट्रवादी काँग्रेसचे नेते, माजी मंत्री हसन मुश्रीफ ( Hasan Mushrif ) यांनी स्वतः 2 म्हैशी विकत घेतल्या आहेत.

राज्यातील सर्वात मोठा दूध संघ असलेल्या कोल्हापूरच्या गोकुळ दूध संघाच्या म्हैशीच्या दुधाला मुंबई, पुणे, नाशिक अशा ठिकाणी मोठी मागणी आहे. गोकुळकडं मोठ्या प्रमाणात म्हैशीचं दूध येते मात्र तरीही ते अपुर पडत आहे. त्यातच गुजरातच्या अमूलन राज्यात हातपाय पसरण्यास सुरवात केली आहे.

लोकांची वाढती मागणी आणि अमूलच आव्हान यामध्ये गोकुळ कुठं कमी पडू नये असा प्रयत्न सुरू आहे. त्यासाठी कोल्हापूर जिल्ह्यातील शेतकऱ्यांनी मोठ्या प्रमाणात म्हैशी खरेदी करून दूध उत्पादन वाढवावे यासाठी विविध योजना गोकुळ आणि जिल्हा बँकेच्या वतीने आखण्यात येत आहेत.

या प्रोत्साहनाबरोबर आम्हीही म्हैशी पाळतो असा संदेश जावा म्हणून हसन मुश्रीफ यांनी दोन म्हैशी विकत घेऊन त्याचा फोटो सोशल मीडियावर शेअर केला आहे. मुश्रीफाकडे अगोदर आठ म्हैशी आहेत आता आणखी दोन म्हशी घेऊन आता दहा म्हैशीचा गोठा त्यांनी केला आहे. त्यांनी शेतकऱ्यांनीही म्हैशी खरेदी करून दूध उत्पादन वाढवावं असे आवाहन केलं आहे.