मुश्रीफसाहेबांनी आम्हाला मृत्यूच्या दारातून परत आणले!

मुरगूड (जि. कोल्हापूर) : ग्रामविकास मंत्री हसन मुश्रीफसाहेब (Hasan Mushrif) यांनी आम्हाला साक्षात यमाच्या दारातून सुखरुप परत आणले आहे, अशी कृतज्ञतेची भावना मुरगूडच्या अपघातग्रस्त लोकरे कुटुंबीयांनी व्यक्त केली. मुंबईतील (Mumbai) उपचारानंतर हे कुटुंब सुखरूप मुरगूडला घरी परतले आहे. त्यानंतर नवीद मुश्रीफ यांनी भेटून या कुटुंबीयांची विचारपूस केली. (Hasan Mushrif Saheb brought us back through the door of death!)

मुरगूडच्या लोकरे कुटुंबातील पती-पत्नींसह मुलगी असा तिघांच्याही अपघाताची कहाणी तितकीच हृदयद्रावक आहे. महिन्यापूर्वी सूर्यकांत साताप्पा लोकरे (वय ५१), त्यांच्या पत्नी सरिता (वय ४७), व मुलगी सानिका (वय १९) हे तिघे घरगुती कामानिमित्त मोटरसायकलीवरून कोल्हापूरला चालले होते. इस्पूर्लीजवळ त्यांच्या मोटारसायकलला अपघात झाला. यात गंभीर दुखापत होऊन तिघेही बेशुद्ध पडले होते.

रणजित सूर्यवंशीना ही माहिती समजताच तातडीने तिघांनाही पुढील उपचारासाठी कोल्हापुरातील खासगी इस्पितळात दाखल केले. लोकरे यांच्या फुफ्फुसाला रक्तपुरवठा करणारी रक्तवाहिनी फुटली होती तसेच त्यांचा डावा पायही दोन ठिकाणी फॅक्चर झाला होता. सरिता लोकरे यांचा उजवा हात व डावा पाय फॅक्चर झाला होता, मुलगी सानिकाच्या डोक्याला मार लागल्यामुळे मेंदूला सूज आली होती. तिघेही दुसऱ्या दिवशीच शुद्धीवर आले. मुंबईतील उपचाराकामी कागदपत्रांच्या पूर्ततेसाठी नवीद मुश्रीफ यांनी नायब तहसीलदार शिवाजीराव गवळी यांच्याकडे पाठपुरावा करून अगदी सुटीच्या दिवशीही गवळी यांनी कागदपत्रांची पूर्तता करून दिली होती.

कार्डियाक ॲम्बुलन्सपासून १५ लाखांचे मोफत उपचार!

लोकरे यांची चिंताजनक स्थिती व उपचाराच्या भल्यामोठ्या खर्चाची माहिती राज्याचे ग्रामविकास मंत्री हसन मुश्रीफ यांना दिली. मंत्री मुश्रीफ यांनी तातडीने त्यांना कार्डियाक ऍम्ब्युलन्स करून कोल्हापूरमधून मुंबईला ‘हिरानंदानी’ या हॉस्पिटलला हलविले. तिथे त्यांच्यावर फुफ्फुसाला रक्तपुरवठा करणाऱ्या फुटलेल्या रक्तवाहिनीच्या किचकट व गुंतागुंतीच्या शस्त्रक्रियेनंतर डाव्या पायाच्या दोन्ही शस्त्रक्रियाही यशस्वीरित्या पार पडल्या. त्यासाठीचा १५ लाखांहून अधिक खर्चाचे उपचार अगदी मोफत झाले.