Koregaon APMC News : कोरेगावात लोकांच्या उद्रेकाला सुरवात; विरोधकांचे गणित त्यांच्यावरच उलटले... शशिकांत शिंदे

-राजेंद्र वाघ

Shashikant Shinde News : पैशाच्या जोरावर निवडणुका जिंकण्याचे दिल्लीचे, राज्याचे व आपल्या विभागातील राजकारण आता लोकांना नको आहे. त्यात बदल करण्याची लोकांची भावना कोरेगाव बाजार समितीच्या Koregaon APMC निवडणुकीत दिसून आली. लोकांच्या उद्रेकाला या निवडणुकीपासून सुरवात झाली आहे. विरोधकांचे निवडणुकीचे गणित त्यांच्यावरच उलटले आहे, अशी टीका आमदार शशिकांत शिंदे Shashikant Shinde यांनी केली आहे.

कोरेगाव बाजार समितीच्या निवडणुकीत महाविकास आघाडी पुरस्कृत शेतकरी विकास पॅनेलने मिळवलेल्या विजयानंतर ल्हासुर्णे येथील निवासस्थानी झालेल्या पत्रकार परिषदेत आमदार शशिकांत शिंदे बोलत होते. ते म्हणाले, "रामराजे नाईक निंबाळकर, मी, बाळासाहेब पाटील, दीपक चव्हाण, नितीन पाटील, सुनील माने यांच्यासह आमचे सर्व कार्यकर्ते एकदिलाने लढले. या निवडणुकीतील विजयामुळे कार्यकर्त्यांना उर्जा मिळाली आहे.

विधानसभेच्या निवडणुकीतील पराभवानंतर मोठ्या विजयाचा आनंद उद्याच्या निवडणुकीसाठीची जिद्द कार्यकर्त्यांमध्ये निर्माण झाली आहे. पैशाच्या जोरावर निवडणुका जिंकण्याचे दिल्लीचे, राज्याचे व आपल्या विभागातील राजकारण आता लोकांना नको आहे. त्यात बदल करण्याची लोकांची भावना या निवडणुकीत दिसून आली आहे. लोकांच्या उद्रेकाला या निवडणुकीपासून सुरवात झाली आहे. विरोधकांचे निवडणुकीचे गणित त्यांच्यावरच उलटले आहे.

तालुक्याच्या तीन मतदारसंघातील विभाजनामुळे अपयशाचे खापर मधल्या भागावर फोडले जायचे. या वेळी मात्र मधल्या भागातूनच अधिक मताधिक्य मिळाले आहे. विरोधातील सूज्ञ मतदारांनीही तिकडच्या जाचामुळे आम्हाला प्रत्यक्ष, अप्रत्यक्ष मदत केली आहे. लोकांनीच ही निवडणूक हातात घेतली होती. त्यामुळे विद्यमान लोकप्रतिनिधींचा पराभव होऊ शकतो, असा विश्वास लोकांमध्ये निर्माण झाला आहे.

या निवडणुकीत काँग्रेस व राष्ट्रवादीचे पदाधिकारी, कार्यकर्ते सक्रिय राहिले. शिवसेनेच्या कार्यकर्त्यांना न्याय देता आला नाही; परंतु यापुढील काळात त्यांना सन्मानाने सोबत घेऊन आगामी जिल्हा परिषद, पंचायत समितीसह सर्व निवडणुका ताकदीने लढवून विजय मिळवू." छत्रपती शिवाजी महाराज, फुले, शाहू, आंबेडकर, यशवंतराव चव्हाण यांच्या पुरोगामी महाराष्ट्रासाठी एकत्र येऊन समोरचा सध्याचा या देशातील, राज्यातील व या विभागातील शत्रू पराभूत करू, असा विश्वास आमदार शशिकांत शिंदे यांनी व्यक्त केला.