अजित पवारांच्या या निर्णयामुळे नायगांवात आनंदोत्सव...

खंडाळा : महाज्योतीचे देशातील पहिले मुलींचे नॅशनल डिफेन्स अकादमीचे स्पर्धा पूर्व प्रशिक्षण केंद्र ज्ञानज्योती सावित्रीबाई फुले जन्मगांव नायगांव (ता. खंडाळा) येथे होणार आहे. यासाठी अर्थसंकल्पात 24 कोटी रुपयाची तरतूद उपमुख्यमंत्री अजित पवार यांनी केली आहे. यासाठी अन्न व नागरी पुरवठा मंत्री छगन भुजबळ यांनी लक्ष घातले होते, अशी माहिती महात्मा ज्योतिबा फुले संशोधन व प्रशिक्षण संस्थाचे संचालक प्रा. दिवाकर गमे यांनी दिली आहे.

सावित्रीबाई फुले यांच्या पुण्यतिथीच्या पूर्वसंध्येलाच या प्रशिक्षण केंद्राबाबत शासनाने जाहीर करुन भावपूर्ण आंदराजंली दिली आहे. यावर्षीच्या सावित्रीबाई फुले जयंती दिवशी कार्यक्रमात मंत्री भुजबळ यांनी मुलींसाठी राष्ट्रीय संरक्षण प्रबोधिनीचे देशातील पहिले निवासी स्पर्धा पूर्व प्रशिक्षण केंद्र सुरू करणार असल्याची घोषणा केली होती.

यानुसार महाराष्ट्र शासनाच्या वतीने याबाबत आदेश दिल्याने येथे महात्मा ज्योतिबा फुले संशोधन व प्रशिक्षण संस्थाच्या वतीने राज्यातील मुलीसाठी देशातील पहिले मोफत व निवासी प्रशिक्षण केंद्र लवकरच सुरू होत आहे. यासाठी लागणाऱ्या जागेबाबत यापूर्वीच पाहणी करण्यात आली होती. येथे सुरूवातीला १०० मुलींचे हे निवासी प्रशिक्षण केंद्र मोफत सुरू केले जाणार आहे. त्या सोबतच विविध स्पर्धा पूर्व प्रशिक्षण, किमान कौशल्यावर आधारीत प्रशिक्षण केंद्रे, अद्यावत ग्रंथालय, अभ्यासिका ही सुरु केल्या जाणार आहे.

शासनाने या प्रशिक्षण केंद्रास मंजुरी दिल्याबाद्दल महाज्योतीचे संचालक प्रा. दिवाकर गमे यांनी मंत्री अजित पवार व मंत्री छगन भुजबळ यांचे आभार मानले आहेत. तसेच नायगांव नागरीकांचे सुध्दा सहकार्याबाबत अभिनंदन केले आहे. नायगाव येथे पेढे वाटुन आनंद व्यक्त करण्यात आला. ग्रामस्थांच्या वतीने स्मारकातील महात्मा फुले व सावित्रीबाई फुले यांच्या पुतळ्यास पुष्पहार अर्पण करण्यात आले. संपूर्ण देशासाठी महिलांसाठी शिक्षणाचे दारे उघडणारे नायगाव या पविञभुमीत देश संरक्षणासाठीही मुलींना घडविण्याचे कार्याची सुरूवातही याच पवित्रभूमीतुन देशातुन प्रथमच घडत आहे, अशी प्रतिक्रिया समता परिषदेचे जिल्हाध्यक्ष राजेंद्र नेवसे यांनी दिली.