मोठी बातमी : पुढचा मुख्यमंत्री राष्ट्रवादीचाच असेल !

सातारा : राज्यात महाविकास आघाडीमध्ये सारे काही आलबेल सुरु असताना पुढच्या मुख्यमंत्रीपदावरुन राजकारण रंगण्याची चिन्हे आहेत. राष्ट्रवादीच्या खासदार सुप्रिया सुळे यांनी याआधी 'पुढचा मुख्यमंत्री राष्ट्रवादीचा होऊ दे,' असे विधान केलं होतं त्यानंतर आता राष्ट्रवादीचे नेते, सामाजिक न्यायमंत्री धनंजय मुंडे (Dhananjay Munde) यांनी "पुढचा मुख्यमंत्री राष्ट्रवादीचाच (NCP) असेल," असे विधान केल्यानं पुन्हा एकदा यावर चर्चा सुरु झाली आहे. (dhananjay munde latest news)

धनंजय मुंडेच्या या विधानामुळे अनेकांच्या भुवया उंचावल्या आहेत. धनंजय मुंडे सातारा येथील सभेत बोलत होते.ते साताऱ्यातील डिस्कळ येथे एका सभेत बोलत होते. राष्ट्रवादीचे नेते शशिकांत शिंदे यांच्या मतदारसंघात धनंजय मुंडे दौऱ्यावर आहेत.

"पुढचा मुख्यमंत्री राष्ट्रवादीचाच (NCP) असेल," असे विधान धनंजय मुंडे (Dhananjay Munde) यांनी केल्यानं राजकीय चर्चांना उधाण आलं आहे. सुप्रिया सुळे यांच्यानंतर आता धनंजय मुंडे यांनी विधान केल्याने राजकीय वर्तुळात जोरदार चर्चा सुरु झाली आहे.

यावेळी धनंजय मुंडे यांनी महाविकास आघाडीचेच घटक असलेल्या शिवसेनेच्या आमदारांवरही अप्रत्यक्ष टीका केली. यावेळी त्यांनी "पुढच्या वेळी सामाजिक न्याय आणि विशेष सहाय्य मंत्री पदाचे खाते हे आपल्याकडेच असेल कारण पुढचा मुख्यमंत्री हा आपलाच असेल," असे मुंडे म्हणाले.

धनंजय मुंडे यांच्या या विधानावर महसूलमंत्री बाळासाहेब थोरात म्हणाले, "प्रत्येकाला पक्ष वाढवण्याचा अधिकार आहे. आम्ही तिने पक्ष एकत्र असलो तरी प्रत्येकाला आपला पक्ष वाढवण्याची मुभा आहे,"