अशोक चव्हाण म्हणाले, राजकीय वॉरला गॅंग वॉर होऊ देऊ नका...

अहमदनगर - राज्याचे सार्वजनिक बांधकाम मंत्री अशोक चव्हाण ( Ashok Chavan ) आज शिर्डी येथे आले होते. त्यांनी साईबाबांचे दर्शन घेतल्यावर उपस्थित पत्रकारांशी संवाद साधला. या प्रसंगी त्यांनी राज्य व देशात सुरू असलेल्या आरोप-प्रत्यारोपाच्या राजकारणावर भाष्य केले. ( Ashok Chavan said, don't let political war become gang war ... )

अशोक चव्हाण म्हणाले, दुःख वाटते सार्वजनिक जीवनामध्ये जे वातावरण दुषित करण्यात आले आहे. ते देश व महाराष्ट्राच्या निश्चितच हिताचे नाही. असे माझे व्यक्तिगत मत आहे. आरोप झाल्यावर प्रत्यारोप होतातच. त्यातून फारसे काही निष्पन्न होत नाही. यात सर्वसामान्य जनतेला हाही स्वारस्य नाही. देशात महागाईचा प्रश्न मोठा आहे. जनहिताची कामे व्हावीत अशी जनतेची अपेक्षा आहे मात्र ज्या पद्धतीने राजकीय वातारण गढूळ करण्याचे काम सातत्याने सुरू आहे, ते योग्य नाही. राजकीय वॉरला गॅंग वॉर होऊ देऊ नका, असे आवाहन मंत्री चव्हाण यांनी केले.

ते पुढे म्हणाले की, लोकशाही मार्गाने निवडून आलेले हे सरकार आहे. विरोधकांनी योग्य पद्धतीने विरोध करावा. खालच्या पातळीवर येऊन ज्या पद्धतीने आरोप प्रत्यारोप होत आहेत. एकमेकांच्या घरापर्यंत जाण्याचा जो प्रकार झाला तो न शोभणारा आहे. अशा प्रकाराला सामान्य माणूस कंटाळला आहे. कायद्याचा वापर विरोधकांवर करणे हे लोकशाहीला मारक आहे.

राज ठाकरेंच्या सभांच्या ठिकाणी जमावबंदी लागू करण्याबाबत ते म्हणाले, सभा घेताना सामाजिक संघर्ष निर्माण होऊ नये. लोकांच्या भावना दुखावता कामा नये, अशा प्रकारच्या अटी घालणे योग्य आहे. लोकशाही मार्गाने आम्ही परवानगी देत आहोत. मात्र व्यासपीठाचा उपयोग राजकीय गोष्टीसाठी करून सामाजिक तनाव निर्माण होणे अयोग्य आहे. त्यातून कायदा व सुव्यवस्थेचे प्रश्न निर्माण होतात. अशा बाबी राज्य सरकार कधीही खपवून घेणार नाही. तुम्ही हनुमानाचे भक्त असाल तर मंदिरात जाऊन हनुमान चालिसा म्हणा. एखाद्याच्या घरात जाऊन हनुमान चालिसा म्हणण्याची काय गरज आहे. यातून धार्मिक भावना भडकविण्याच प्रयत्न होत असल्याचे मंत्री चव्हाण यांनी सांगितले.