Gram panchayat election 2022: कोण आला रे कोण आला...गुवाहाटीचा चोर आला....कुमठेत भाजप, राष्ट्रवादीत राडा...

सातारा : कुमठे ग्रामपंचायत निवडणुकीसाठी गावात कोपरा सभा घेण्याच्या कारणावरून राष्ट्रवादी व भाजपच्या कार्यकर्त्यांत रात्री राडा झाला. यावेळी राष्ट्रवादीच्या कार्यकर्त्यांनी पन्नास खोके...एकदम ओक्के, कोण आला रे कोण आला...गुवाहाटीचा चोर आला, अशी घोषणाबाजी केली. त्यामुळे काही काळ तणावाचे वातावरण निर्माण झाले होते. पोलिसांनी हस्तक्षेप केल्याने तणाव निवळला. कुमठे ग्रामपंचायतीत आमदार शशिकांत शिंदे यांच्या गटाची सत्ता असून या वेळेस ही ग्रामपंचायत ताब्यात घेण्यासाठी आमदार महेश शिंदे यांच्या गटाने ही पॅनेल टाकले आहे.

कोरेगाव तालुक्यातील कुमठे ग्रामपंचायतीची निवडणूक प्रक्रिया सुरु आहे. या ग्रामपंचायतीवर आमदार शशिकांत शिंदे यांच्या गटाची सत्ता असून या वेळेस ही ग्रामपंचायत ताब्यात घेण्यासाठी आमदार महेश शिंदे यांच्या गटाने ही पॅनेल टाकले आहे.

काल (बुधवारी) रात्री या गावात दोन्ही बाजूच्या पॅनेलची कोपरा सभा होणार होती. या कारणावरुन राष्ट्रवादी व भाजपच्या कार्यकर्त्यांत रात्री राडा झाला.कोपरा सभेसाठी आमदार महेश शिंदेही तेथे आले होते. यावेळी राष्ट्रवादीच्या कार्यकर्त्यांनी पन्नास खोके एकदम ओके, कोण आला रे... कोण आला.. गुवाहाटीचा चोर आला... अशी घोषणाबाजी केली.

तसेच आमदार शशिकांत शिंदेंच्या जयघोषाच्याही घोषणा दिल्या. त्यामुळे येथे तणावपूर्ण परिस्थिती निर्माण झाली होती. पण, पोलिसांनी तातडीने गावात येऊन परिस्थिती नियंत्रणात आणली. या महत्वपूर्ण गावात सत्ता यावी यासाठी आमदार महेश शिंदे यांच्या गटाकडून प्रयत्न सुरु आहेत. यावेळी दोन्ही गटात ग्रामपंचायतीसमोरच राडा झाला.

कुमठे ग्रामपंचायतीत एकुण १५ सदस्य आणि सरपंद एक असे १६ उमेदवार असून त्यासाठी दोन्ही बाजूकडून ३२ उमेदवार रिंगणात आहेत. ही ग्रामपंचायत ताब्यात घेण्यासाठी राष्ट्रवादी व भाजपमध्ये जोरदार रस्सीखेच सुरु आहे. त्यातूनच काल गावात राडा झाला. यावेळी पोलिसांनी मोठा पोलिस बंदोबस्त तैनात केला होता.