जालन्यातून अपहरण झालेल्या विद्यार्थ्याची 5 तासानंतर सुटका; अपहरणकर्त्यांनी मागितले होते 4 कोटी

जालना : जालना (Jalna) शहरात एका मेडिक व्यावसायिकाच्या दहावीत शिक्षण घेणाऱ्या मुलाचे अपहरण (Kidnap) करून तब्बल 4 कोटीची खंडणी मगितल्याची घटना शहरात घडली होती. या घटनेने शहरात एकच खळबळ उडाली होती. दरम्यान घटनेची माहिती मिळताच पोलिसांनी तातडीने जिल्ह्यात नाकाबंदी करत 5 तासात मुलाला शोधण्यात पोलिसांना यश आलं आहे

जालना शहरातील मेडीकल व्यावसायिक महावीर गादिया यांचा 16 वर्षाचा मुलगा स्वयम् हा 10 वी ची परीक्षा देण्यासाठी पोद्दार शाळेच्या परीक्षा केंद्रावर गेला होता. मात्र, साडेबारा वाजता परीक्षा संपूनही तो परत आला नाही, म्हणून पालकांनी ड्राइव्हरच्या मोबाईलवर फोन केला असता अज्ञात अपहरण कर्त्यांनी त्यांना मुलगा हवा असल्यास चार कोटीं रुपये आणून देण्याची मागणी केली. त्यांना अंबड चौफुली, त्यानंतर अंबड शहरात बोलावून अपहरणकर्ते फरार झाले होते.

मुलाचा शोध घेण्यासाठी पोलिसांनी जिल्ह्यात मुख्य रस्त्यासह जिल्हाभरात नाकाबंदी करून चालकाचा मोबाईल ट्रेस केला. मात्र, मोबाईल लोकशेन सतत बदलत होते. यामुळे सर्व तालुक्यातील पोलिस यंत्रणा कामाला लागली. यानंतर मोबाईल लोकेशनवरून पोलिसांना मुलगा आणि चालक अंबड रोडवरील शहापूर जवळ आढळून आला आहे. दरम्यान या प्रकरणी पोलिसांनी चालकाला ताब्यात घेत अपहरणकर्त्याचा शोध सुरू केला आहे. याप्रकरणाचा पुढील तपास जालना पोलिस करत आहेत.