Marathwada: गोगलगायीमुळे झालेल्या पिक नुकसानीसाठी तीन जिल्ह्यांना ९८ कोटींची मदत..

औरंगाबाद : शंखी गोगलगायीमुळे मराठवाड्यातील काही जिल्ह्यांमध्ये पिकांचे मोठ्या प्रमाणात नुकसान झाले होते. या (Farmers) शेतकऱ्यांना तातडीने मदत करावी अशी मागणी केली जात होती. अतिवृष्टीमुळे नुकसान झालेल्या शेतकऱ्यांसाठी सरकारकडून मदत जाहीर करण्यात आली होती. परंतु शंखी गोगलगायीमुळे (Crop) पिकांचे नुकसान झालेल्या शेतकऱ्यांचा यात समावेश नव्हता.

अखेर मराठवाड्यातील बीड, लातूर आणि उस्मानाबाद तीन जिल्ह्यातील शेतकऱ्यांच्या नुकसानीसाठी राज्य सरकारने ९८ कोटी ५८ लाखांची मदत जाहीर केली आहे. (Marathwada) लातूर, उस्मानाबाद, बीड या तीन जिल्ह्यांमध्ये शंखी गोगलगायीमुळे सोयाबीन शेत पिकाचे मोठ्या प्रमाणावर नुकसान झाले आहे.

या संदर्मुभात आमदार धनंजय मुंडे, संभाजी पाटील निलंगेकर, अभिमन्यू पवार, नमिता मुंदडा यांनी नुकत्याच झालेल्या पावसाळी अधिवेशनात याकडे सरकारचे लक्ष वेधले होते. त्यानंतर मुख्यमंत्री एकनाथ शिंदे यांनी या संदर्भात मदतीचे निर्देश दिले होते. त्यानुसार या तीन जिल्ह्यांना ९८ कोटी ५८ लाख रुपये निधी देण्यात आला आहे.

याबाबतचा शासन निर्णयही जारी करण्यात आले आहेत. मराठवाड्यातील तीन जिल्ह्यांमधील ७४ हजार हेक्टरमधील पिकांचे नुकसान झाले होते. १ लाख १८ हजार ९९६ शेतकऱ्यांना शंखी गोगलगायींचा फटका बसला होता. सर्वाधिक नुकसान लातूर जिल्ह्यात ६८ हजार ३८५ हेक्टर, बीडमध्ये ३ हजार ८२२ तर उस्मानाबादमध्ये २८३ हेक्टरवरील पिकांवर याचा परिणाम झाला होता.

जून ते आॅगस्ट दरम्यान गोगलगायींचा प्रादुर्भाव बीड, लातूर, उस्मानाबाद जिल्ह्यात वाढला होता. या शिवाय सततच्या पावसामुळे ४ लाख ३९ हजार ६२० हेक्टरवरील पिकांचे नुकसान झाले. त्यामुळे शेतकऱ्यांना सततचा पाऊस आणि गोगलगायीमुळे झालेले नुकसान असा दुहेरी फटका बसला.