लातूरमध्ये महाविकास आघाडीला यश; काँग्रेसला सर्वाधिक जागा

लातूर : लातूर जिल्ह्यातील चाकूर, देवणी, शिरूर अनंतपाळ व जळकोट नगरपंचायत सार्वत्रिक निवडणुकीचा निकाल जाहीर झाला. (Congress) यामध्ये महाविकास आघाडीला निर्विवाद विजय मिळाला असून, काँग्रेसला सर्वाधिक २३ जागा मिळाल्या आहेत. (Latur) राष्ट्रवादी काँग्रेस १४, तर शिवसेनेला ६ जागांवर विजय मिळवता आला. (Amit Deshmukh)

या निवडणुकीत मतदारांनी महाविकास आघाडीला जिल्ह्यात कौल दिल्याचे पालकमंत्री अमित देशमुख यांनी म्हटले आहे. जिल्ह्यात महाविकास आघाडीच्या माध्यमातून पालकमंत्री देशमुख यांनी नगरपंचायत निवडणुकीचे नेतृत्व केले होते.

चाकूर, देवणी, शिरूरअनंतपाळ व जळकोट येथे महाविकास आघाडी उमेदवारांसाठी त्यांनी प्रचार सभाही घेतल्या. या सभेच्या माध्यमातून विकासाला गती देण्यासाठी, मूलभूत सुविधांची उभारणी करण्यासाठी संधी देण्याचे आवाहन त्यांनी मतदारांना केले होते.

महाविकास आघाडीच्या माध्यमातून केलेली विकासकामे मतदारांसमोर ठेवत त्यांनी याच मुद्यावर प्रचारात जोर दिला होता. मतदारांनी जिल्ह्यातील नगरपंचायत निवडणुकीत विकासासाठी महाविकास आघाडीला कौल देऊन मतदान केल्याचेही देशमुख म्हणाले.

या निवडणुकीत काँग्रेसला सर्वाधिक २३ जागा मिळाल्या. देवणी नगरपंचायतीमध्ये एकहाती सत्ता आली आहे. राष्ट्रवादी काँग्रेस पक्षाला १४ जागा मिळाल्या असून, शिवसेना ६ जागेवर विजयी झाली आहे.

या पुढील काळात स्थानिक पातळीवर विकासाची साखळी मजबूत करून मतदारांच्या अपेक्षा पूर्ण करण्यासाठी पदाधिकाऱ्यांनी पुढाकार घ्यावा. महाविकास आघाडी सरकारकडून पूर्ण सहकार्य करण्याची ग्वाहीही देखील देशमुख यांनी दिली.