PWD Minister Ravindra Chavan : रस्त्यावर पडणाऱ्या पावसातून भूजल पुनर्भरणाचा `लातूर पॅटर्न` राज्यभर राबवणार..

Maharashtra : रस्त्यावर पडणारे पावसाच्या पाण्यापासून भूजल पुनर्भरणाचा (Latur) `लातूर पॅटर्न` अतिशय उपयुक्त आहे. यापुढे रस्त्यांची कामे करताना हा पॅटर्न राज्यभर राबविण्यात येणार असल्याचे सार्वजनिक बांधकाम (PWD) मंत्री रवींद्र चव्हाण यांनी नुकतेच सांगितले. तसेच पावसाळ्यापूर्वी विभागातील रस्ते खड्डेमुक्त करण्याची कार्यवाही करण्याच्या सूचना त्यांनी दिल्या. औरंगाबाद आणि नांदेड सार्वजनिक बांधकाम प्रादेशिक विभागाच्या आढावा बैठकीत चव्हाण बोलत होते.

रस्त्यावर पडणारे पावसाचे पाणी जमिनीत जिरवून भूजल पुनर्भरण करण्यासाठी लातूर सार्वजनिक बांधकाम मंडळाचे अधीक्षक अभियंता डॉ. सलीम शेख यांनी जिल्हा वार्षिक योजनेच्या नाविन्यपूर्ण योजनेतून तयार केलेले मॉडेल अतिशय उपयुक्त आहे. (Ravindra Chavan) या उपक्रमामुळे रस्त्यावर पावसाचे पाणी जमा न होता, त्याद्वारे भूजल पुनर्भरण होईल. त्यामुळे भूजल पातळीत वाढ होवून शेतीला मदत होईल. (Marathwada) तसेच रस्त्याचे जीवनमान वाढेल.

त्यामुळे राज्यात मंजूर झालेल्या रस्त्यांच्या कामांमध्ये या उपक्रमाचा समावेश केला जाईल. मराठवाडा, विदर्भासह पाणी टंचाईची समस्या जाणवणाऱ्या इतरही जिल्ह्यांमध्ये या उपक्रमाची अंमलबजावणी प्राधान्याने करण्यात येईल, असे चव्हाण यांनी सांगितले. (Maharashtra) सार्वजनिक बांधकाम विभागांतर्गत करण्यात येणाऱ्या कामांमध्ये पारदर्शकता आणण्यासाठी `प्रोजेक्ट मॅनेजमेंट इन्फॉर्मेशन सिस्टीम` (पीएमआयएस) प्रणाली विकसित करण्यात आली आहे.

यामध्ये प्रत्येक कामाची विविध टप्प्यावरील माहिती, तसेच काम पूर्ण झाल्यानंतर व्हिडीओ, छायाचित्रे अपलोड करणे आवश्यक आहे. सर्व अधिकाऱ्यांनी या प्रणालीवर अद्ययावत माहिती अपलोड करावी. रस्त्यांवरील खड्ड्यांबाबत, कामांच्या दर्जाबाबत प्राप्त होणाऱ्या तक्रारींची तातडीने दखल घेवून त्याचा निपटारा करावा.

तक्रारींची पडताळणी करून त्याबाबतची वस्तुस्थिती संबंधितांना अवगत करावी, अशा सूचनाही चव्हाण यांनी दिल्या. अर्थसंकल्पीय कामे, तसेच योजनेतर कामे जास्त काळ प्रलंबित राहू नयेत, याची दक्षता घ्यावी, असे आवाहन करतानाच निविदेच्या मंजूर किंमतीपेक्षा अधिक खर्च टाळण्याच्या सूचनाही त्यांनी केल्या.