High Court : माजी आमदार अनुसया खेडकरांसह इतर आरोपींना जामीन मंजूर.

Nanded : नांदेड मधील हिंगोली गेट येथे महागाईच्या विरोधात आंदोलन करण्यात आले होते. त्यावेळी झालेल्या सरकारी मालमत्तेच्या नुकसानीस दोषी धरुन (Nanded District Court) नांदेड जिल्हा व सत्र न्यायालयाने तत्कालीन शिवसेना आमदार अनुसया खेडकर आणि इतर शिवसैनिकांना पाच वर्ष सक्तमजुरी ठोठावली. या प्रकरणी मुंबई उच्च न्यायालयाच्या औरंगाबाद खंडपीठात अपील दाखल करण्यात आले असून न्यायमूर्ती आर. जी. अवचट यांनी खेडकर व इतर आंदोलकांचा जामीन मंजूर केला.

सन २००८ मध्ये हे आंदोलन झाले होते. यात आंदोलक आमदार खेडकर आणि अन्य जवळपास दीडशे जणांना पोलिसांनी ताब्यात घेतले होते. (Aurangabad High Court) एसटी चालकाच्या फिर्यादीवरुन एसटी बसेस, मनपा वाहन व पोलिस वाहनांचे नुकसान केले आणि सरकारी कामात अडथळा निर्माण केला असा गुन्हा दाखल करण्यात आला. (Nanded) १९ जणांना अटक करण्यात आली. न्यायालयात दोषारोपपत्र दाखल झाल्यानंतर सरकारतर्फे ११ साक्षीदार तपासण्यात आले.

सुनावणीनंतर सत्र न्यायालयाने अनुसया प्रकाश खेडकर, महेश प्रकाश खेडकर, सुभाष शिंदे, मनोज आहिर उर्फ यादव यांच्यासह अन्य कार्यकर्त्यांना ११ एप्रिल २०२३ रोजी भादंवि कलम ३५३, ३३२, ३३६, ४२७, ३४१, १४३, १४७, १४८ व सार्वजनिक मालमत्ता नुकसान अधिनियम १९८४च्या कलम ३ अन्वये ५ वर्षे सक्तमजुरीची शिक्षा व एक लाख बासष्ट हजार रुपये दंड अशी शिक्षा सुनावली. (Marathwada)

या निर्णयास अनुसया खेडकर आणि इतरांनी खंडपीठात आव्हान दिले. खेडकर यांच्यातर्फे ॲड. शैलेंद्र एस. गंगाखेडकर यांनी न्यायालयाच्या निदर्शनास आणून दिले की, सदर प्रकरणात सत्र न्यायालयाने शिक्षेच्या आदेशाची संपूर्ण प्रत आरोपींना ६ दिवस उलटुनसुध्दा उपलब्ध न करुन दिलेली नाही.

ही बाब सर्वोच्च न्यायालयाच्या निवाड्याच्या विरोधात असून यामुळे आरोपीच्या मौलिक अधिकाराची पायमल्ली करणारी आहे. युक्तीवादानंतर खंडपीठाने आपल्या आदेशात यासंदर्भातील निरीक्षणे नोंदवत सर्व आरोपींचे जामीन मंजूर केले.