मुंडेसाहेबांच्या तिसऱ्या लेकीची राजकारणात एन्ट्री?; यशश्री मुंडेंची दसरा मेळाव्याला पहिल्यांदाच उपस्थिती...

बीड : भाजपचे दिवगंत नेते माजी केंद्रीय मंत्री गोपीनाथ मुंडे (Gopinath Munde) यांच्या दसरा मेळाव्याची परंपरा त्यांच्या कन्या माजी मंत्री पंकजा मुंडे (Pankaja Munde) चालवत आहेत. त्यांचा दसरा मेळावा आज (ता.५ ऑक्टोबर) बीड जिल्ह्यातील भगवान बाबांचे जन्मगाव असलेल्या सावरगावात भगवान भक्तीगडावर होत आहे. त्यांच्या या मेळाव्यास महाराष्ट्रातील विविध भागातील नागरिकांनी मोठ्या संख्येंने उपस्थिती लावली आहे.

दरम्यान, अनेक राजकीय मंडळी देखील व्यासपीठावर उपस्थित आहे. यामध्ये एक विशेष उपस्थिती म्हणजे गोपीनाथ मुंडे यांची तिसरी कन्या यशश्री मुंडे यांची आहे. याचा उल्लेखही बीडच्या खासदार प्रितम मुंडे यांनी आपल्या भाषणात आवर्जून केला आहे. यामुळे या दसऱ्याच्या मुहूर्तावर त्यांची राजकारण एन्ट्री होणार का?, अशी चर्चा सुरू झाली आहे. (Yashshree Munde Latest News)

गेल्या काही वर्षांपासून राज्यातीन अनेक राजकीय मंडळींनी आपल्या मुला-मुलींना राजकारणात सक्रिय केले आहे. त्या पार्श्वभूमीवर आज सावरगावात भगवान भक्तीगडावरील दसरा मेळाव्याला यशश्री मुंडेंची पहिल्यांदाच उपस्थितीवरून चर्चा रंगत आहेत. गोपीनाथ मुंडे यांच्या मोठ्या दोन्हीही मोठ्या मुली पंकजा मुंडे आणि खासदार प्रितम मुंडे या आधीपासूनच राजकारणात सक्रिय आहेत. आता त्यांची तिसरी मुलगी राजकारणात येणार का?, असे चर्चा राजकीय वर्तूळात रंगत आहे.

दरम्यान, यशश्री मुंडे या कधीच राजकीय व्यासपीठावर फारशा दिसत नाहीत. आज त्या पहिल्यांदाच दसरा मेळाव्याला उपस्थित आहेत. त्यामुळे अनेकांच्या भुवया उंचावल्या आहेत. यशश्री मुंडे या पेशाने वकील आहेत. त्यांचा काही वर्षापुर्वी अमेरिकेतील कॉर्नेल विद्यापीठाकडून ‘प्रॉमिसिंग आशियाई स्टुडंट’म्हणून गौरवही करण्यात आला होता.