Bhokardan : आमदार चहा, तसा खासदार चहा येणार, तो भारी असेल ; दानवेंची टोलेबाजी..

भोकरदन : केंद्रीय रेल्वे राज्यमंत्री रावसाहेब दानवे टोलेजाबीसाठी प्रसिद्ध आहेत. त्यामुळे आपल्या कार्यक्रमात, नव्या दुकानाच्या उद्धाटनाला दादा आले पाहिजे असा त्यांच्या कार्यकर्त्यांचा आग्रह असतो. त्यामुळे शक्यतो दानेव आपल्या कार्यकर्त्यांना नाराज करत नाही. कार्यकर्त्याच्या आमदार चहा स्टाॅलच्या उद्धाटनाला दानवे यांच्या पत्नी निर्मला दानवे, आमदार संतोष दानवे ,संजना जाधव शिवम पांडे यांच्यासह भाजपचे सर्व कार्यकर्ते व शहरातील नागरिक मोठ्या संख्येने उपस्थित होते.

भोकरदन या आपल्या गावात एका कार्यकर्त्याने आमदार चहाचा स्टाॅल टाकला आणि त्याचे उद्धाटन रावसाहेब दानवे (Raosaheb Danve) यांनीच करावे असा त्याचा आग्रह होता. भोकरदनमध्येच असल्याने दानवेंनी देखील कार्यकर्त्याचे मन राखले आणि आमदार चहा स्टाॅलचे सहकुटुंब जाऊन उद्घाटन केले. (Jalna) आता आमदार चहा, दानवे खासदार अशावेळी टोला लगावण्याची संधी त्यांनी साधली. आमदार चहा प्रमाणेच आता खासदार चहा देखील येईल आणि तो आमदार चहा पेक्षा भारी, स्वादिष्ट असेल असे म्हणताच उपस्थितांनी दानवेंना दाद दिली.

दानवे म्हणाले, आजच्या काळात व्यवसायात ब्रँडला मोठे महत्त्व प्राप्त झाले आहे. अगदी चहाला देखील "आमदार चहा" या ब्रँड नावाखाली विकले जात आहे. अर्थात जसा आमदार चहा आहे तसा काही दिवसात "खासदार चहा" देखील येणार आहे व तो याहीपेक्षा स्वादिष्ट असणार आहे. ज्याप्रमाणे आम्हा राजकारण्यांना आमदारकी व खासदारकी टिकवणे गरजेचे असते त्याप्रमाणे तुला देखील हा आमदार चहा टिकवून ठेवावा लागेल.

चहा विकण्यापेक्षा तो चहा स्वादिष्ट देऊन चांगल्या प्रकारे टिकवून कसा ठेवता येईल याकडे तू जास्त लक्ष दे. नाहीतर टेबलावर चहा आणि टेबलाच्या खालून "नगरची भिंगरी" विकशील असे करू नको, असा चिमटा दानवे यांनी राजू राऊत या आपल्या खास कार्यकर्त्याला लगावला.

दानवेंनी आपल्या भाषणात चहासोबत अप्रत्यक्षरित्या तळीराम व पोलिसांना चिमटा काढल्याने उपस्थितांच्या भुवया उंचावल्या होत्या. कार्यकर्त्याच्या आमदार चहा स्टाॅलच्या उद्धाटनाला दानवे यांच्या पत्नी निर्मला दानवे, आमदार संतोष दानवे ,संजना जाधव शिवम पांडे यांच्यासह भाजपचे सर्व कार्यकर्ते व शहरातील नागरिक मोठ्या संख्येने उपस्थित होते.