Ambadas Danve On Women Security : महिला असुरक्षित असल्याची गृहमंत्र्यांना जाणीवच नाही..

Shivsens : छत्रपती संभाजीनगरातील चिकलठाणा भागात एका महिलेवर सामुहिक बलात्काराची घटना घडली होती. या गंभीर घटनेची दखल घेत पीडित महिलेच्या घरी विधान परिषदेचे विरोधी पक्षनेते अंबादास दानवे (Ambadas Danve) यांनी नकुतीच भेट दिली. या घटनेतील मृत पावलेल्या महिलेच्या कुटुंबियांवर ओढावलेल्या दु:खात सहभागी होऊन त्यांचे सांत्वन केले.

हे प्रकरण फास्ट ट्रॅक कोर्टात चालविण्याची मागणी यावेळी त्यांनी राज्य सरकारकडे केली. राज्यातील महिला (Women) असुरक्षित आहेत, याची जाणीव राज्याचे गृहमंत्री देवेंद्र फडणवीस (Devendra Fadanvis) यांना नाही, अशी टीका देखील त्यांनी केली.

अंबादास दानवे म्हणाले, सामुहिक बलात्काराची ही घटना चिंताजनक आणि मन हेलावणारी आहे. गुन्हेगारी प्रवृत्तीवर राज्याच्या पोलीस आणि गृह विभागाचा वचक राहिलेला नाही, असे या घटनेवरून दिसून येते.

सदरील घटना निर्भया प्रकरणासारखीच गंभीर असून राज्यातील महिला असुरक्षित आहेत याची जाणीव राज्याच्या गृहमंत्र्यांना राहिलेली नाही. पीडित महिलेला तातडीने न्याय मिळावा आणि दोषींना कठोर शिक्षा व्हावी यासाठी मी प्रयत्न करणार असल्याचेही दानवे यांनी स्पष्ट केले.