Shashikant Warise Case: शशिकांत वारिसे प्रकरणी राज्य सरकारचा विधानपरिषदेत मोठा खुलासा

Ratnagiri News : रत्नागिरीच्या राजापूर तालुक्यातील पत्रकार शशिकांत वारिसे यांचा काही दिवसांपूर्वी अपघाती मृत्यू झाला होता. मात्र, त्यांचा अपघात नसून घातपात असल्याचा संशय व्यक्त करण्यात येत होता. त्यानंतर वारीसे यांच्या मृत्यूप्रकरणाची एसआयटी मार्फत चौकशी करण्याचे आदेश गृहमंत्री देवेंद्र फडणवीस यांनी दिले होते.

यानंतर आज (दि. 17 मार्च) अर्थसंकल्पीय अधिवेशनादरम्यान राज्य सरकारने मोठा खुलासा केला आहे. शशिकांत वारिसे यांचा जाणीवपूर्वक अपघात घडवून आणल्याची कबुली राज्य सरकारने दिली आहे. वारिशे यांच्या अपघाती मृत्यूबाबत विरोधकांनी सरकारला सभागृहात प्रश्न विचारला. त्यावर राज्य सरकारने लेखी उत्तर देत ही कबूली दिली आहे.

या बरोबरच या सर्व प्रकरणाची एसआयटी मार्फत चौकशी सुरू असल्याची माहितीही यावेळी सरकारने दिली. काही दिवसांपू्वी राजापूरमध्ये एका गाडीने शशिकांत वारिसे यांच्या दुचाकीला जोरात धडक दिली होती. यावेळी ते गंभीर जखमी झाले झाले होते. त्यानंतर उपचारादरम्यान त्यांचा मृत्यू झाला होता.

दरम्यान, या प्रकरणातील आरोपी पंढरीनाथ आंबेरकर याने वारिसे यांच्यावरील हल्ला पूर्वनियोजित असल्याची कबुली दिली होती. त्यानंतर आता सरकारनेही मोठा खुलासा केला आहे.