Barsu Refinery Protest: मी देखील तेथे जाणार, मग बघू...; बारसू रिफायनरी प्रकल्पावरुन राजू शेट्टींचा सरकारला इशारा

Ratnagiri News : गेल्या काही दिवसांपासून रिफायनरी प्रकल्पावरुन सुरू असलेला वाद चिघळला आहे. बारसू रिफायनरी प्रकल्पाविरोधात आंदोलन करणाऱ्यांवर पोलिसांनी लाठीचार्ज करत आंदोलकांना रोखण्यासाठी पोलिसांनी अश्रुधुराच्या नळकांड्या फोडल्या. तर काहींना पोलिसांनी ताब्यात घेतलं. त्यामुळे बारसू रिफायनरी प्रकल्पावरून आता राजकारण तापलं आहे.

दुसरीकडे सत्ताधारी आणि विरोधकांमध्ये या प्रकल्पावरून आरोप-प्रत्यारोप सुरु आहेत. या पार्श्वभूमीवरच शेतकरी संघटनेचे नेते राजू शेट्टी यांनीही आता या प्रकरणात उडी घेतली आहे. आपण देखील वेळ पडली तर तेथे जाणार असून मग पाहू किती अन्याय करता, असा इशारा राजू शेट्टींनी सरकारला दिला.

राजू शेट्टी म्हणाले, "पोलिसांनी शेतकऱ्यांवर लाठीचार्ज केला आहे. पोलिसांचं हे वर्तन चुकीचे आहे. त्यामुळे याचा मी निषेध करतो. शेतकरी जर जमीन द्यायला तयार नसतील तर सरकार कोणत्या आधाराने त्यांची जमीन हडप करण्याचा प्रयत्न करत आहे. अशा पद्धतीने सरकार दादागीरी करत उद्योगपतीची बाजू घेत असेल तर आम्ही गप्प बसणार नाहीत".

"पोलिसांनी शेकऱ्यांवर लाठीचार्ज केला. त्यामुळे यामध्ये गृहमंत्र्यांनी तातडीने लक्ष घालावं. आम्ही बारसूच्या शेतकऱ्यांना एकाकी पडू देणार नाहीत. ताकदीने त्यांच्या पाठीमागे उभा आहोत. जर वेळ पडली तर मी देखील त्या ठिकाणी जाईल. मग बघू सरकार किती अन्याय करतं", असा इशारा शेट्टींनी सरकारला दिला आहे.

उद्योगमंत्री उदय सामंत काय म्हणाले?

बारसू रिफायनरी विरोधातील स्थानिकांचा विरोध वाढला आहे. यावर आता उद्योगमंत्री उदय सामंत यांनी आंदोलनाच्या नावाखाली राजकारण सुरू असल्याचा आरोप केला आहे.

उदय सामंत म्हणाले, "शेतकऱ्यांना आजही आमचं सांगणं आहे, त्यांनी कोणाच्याही राजकीय दबावाला बळी पडू नये. शेतकऱ्यांच्या काही शंका असतील तर त्या दूर करण्यासाठी सरकार तयार आहे. मुख्यमंत्री एकनाथ शिंदे यांनी देखील यासंदर्भात आमच्याशी चर्चा केली आहे".

"शेतकऱ्यांना कोणताही त्रास होऊ नये यासाठी आम्ही प्रयत्न करत आहोत. मात्र, कोल्हापूरमधील काही लोकं या ठिकाणी उपस्थित आहेत, त्यामुळे राजकारण होऊ नये असंच आमचं मत आहे", असं सामंत म्हणाले.

Edited By- Ganesh Thombare