सोलापूरची पोटनिवडणूक लागली तर ढोबळे भाजपचे उमेदवार?

पंढरपूर : सोलापूर लोकसभेचे खासदार डॉ. जयसिद्धेश्वर महास्वामी यांच्या जातीचे प्रमाणपत्र  रद्द केल्याचा निकाल आला आहे. त्यानंतर आता पोटनिवडणूक लागणार की निकालाला न्यायालयात आव्हान दिले जाणार, याची चर्चा सुरू असतानाच माजी मंत्री लक्ष्मणराव ढोबळे यांनी संभाव्य पोटनिवडणुकीसाठी आपली दावेदारी जाहीर केली आहे.

भाजपाने जर पक्षादेश दिला तर आपण सोलापूर लोकसभा पोटनिवडणूक लढण्यास तयार आहोत, असे ढोबळे यांनी पंढरपुरात पत्रकारांशी बोलताना सांगितले.

जयसिद्धेश्वर महास्वामी यांच्या जातीचे प्रमाणपत्र जात पडताळणी समितीने अपात्र ठरवले.  महास्वामी हे 2019 च्या लोकसभा निवडणुकीमध्ये भाजपा कडून खासदार झाले होते. त्यावेळी सोलापूर लोकसभा निवडणूक लढवण्यासाठी माजी मंत्री लक्ष्मणराव ढोबळे देखील इच्छुक होते. 

यापरिस्थितीत लोकसभेची निवडणूक लागली आणि पक्षाने संधी दिली तर आपण निवडणूक लढवू, असा ठाम विश्वास ढोबळे यांनी व्यक्त केला. असे जरी असले तरी महास्वामींचे प्रमाणपत्र उच्च न्यायालयात खरे ठरेल, असा आशावाद त्यांनी व्यक्त केला.