शिरोळ ः शिरटी (ता. शिरोळ) येथील ग्रामपंचायतीच्या निवडणुकीत माजी खासदार राजू शेट्टी यांची स्वाभिमानी शेतकरी संघटना व आरोग्य राज्यमंत्री राजेंद्र पाटील यड्रावकर यांच्या गटात चुरशीची व प्रतिष्ठेची लढत होण्याचे संकेत आहेत. राज्यपाल कोट्यातून विधान परिषदेवरील निवडीची राजू शेट्टी यांना प्रतिक्षा आहे. मात्र या गावातील निकालाचेही असेच औत्सुक्य असणार आहे.
मंत्री यड्रावकर व शेट्टी यांना सत्ता संपादन करण्यासाठी वेगवेळ्या टेकू असलेल्या पक्षांचा व गटांचा आधार घ्यावा लागणार आहे. लोकसभा, विधानसभा, जिल्हा परिषद, पंचायत समितीच्या निवडणुकीत येथील जनतेचा कल, निवडणुकीतील उमेदवार पाहून त्या उमेदवाराच्या पाठीशी गावातील नागरिक राहण्याची परंपरा आहे. माजी खासदार राजू शेट्टी यांना या गावाने नेहमीच साथ दिली आहे. गेल्या पंचवार्षिक निवडणुकीत यड्रावकर गटाच्या कार्यकर्त्यांना दारुण पराभव पत्करावा लागला होता. 13 पैकी 12 जागा स्वाभिमानी शेतकरी संघटनेने जिंकून येथे सत्तांतर झाले होते.
तथापी पाच वर्षांत वेगवेगळ्या घडामोडी घडल्या आहेत. गावचा कारभार करणाऱ्या कार्यकर्त्यांची मने सांभाळली नसल्याचे वातावरण आहे. यामुळे स्वाभिमानी शेतकरी संघटनेला पाठिंबा देणारे काही कार्यकर्ते, तसेच स्वाभिमानीतील निष्ठावंत कार्यकर्ते संतोष पाटील यड्रावकर गटाच्या आघाडीत सामील झाले आहेत. तथापी यादव गटाचे निष्ठावंत अभय गुरव हे स्वाभिमानी संघटनेच्या युतीत सामील झाले आहेत. मंत्री यड्रावकर व माजी खासदार शेट्टी यांनी शिरटीची निवडणूक प्रतिष्ठेची बनविली आहे. यामुळे या ठिकाणची दुरंगी लढत रंगतदार बनणार आहे.
दृष्टिक्षेपात
*प्रभाग : 5
*सदस्य : 13
*मतदार : 4224
*पुरुष मतदार 2193
*महिला मतदार 2031
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.