आमदार मुश्रीफांनी मारली देवळाच्या कट्ट्यावरच बैठक.

मुरगूड  : कागल तालुक्यातील मळगे बुद्रुक हे गाव. काल दुपारी दोनच्या सुमाराला पूर परिस्थितीची पाहणी करण्यासाठी आमदार हसन मुश्रीफ या गावात आले होते. गाडीतून उतरताच त्यांनी ग्रामदैवत भैरवनाथाच्या दर्शनासाठी मंदिरात गेले. एवढ्यातच पूरग्रस्तांबरोबरच ग्रामस्थही मंदिरातच गोळा झाले. त्यामुळे आमदार मुश्रीफ यांनी ही गावकऱ्यांबरोबर मंदिराच्या कट्टयावरच ठिय्या मारला. 

त्याचवेळी त्यांना बसण्यासाठी खुर्ची घेऊन लगबगीने येणाऱ्या कार्यकर्त्याला त्यांनी आवर्जून सांगितले, ''अरे.....खुर्ची नको. मला देवासमोर देवळाच्या कट्टयावरच बसायचे आहे''. मग त्यांनी गावकऱ्यांसोबत कट्ट्यावर बसूनच चहाही प्यायला. गावकामगार तलाठी, ग्रामसेवक आणि कृषी सहाय्यक तसेच ग्रामस्थांसोबत महापुरामुळे झालेल्या नुकसानीचा आढावा घेऊन ते पुराने बाधित झालेल्या शेतीची व पुराने पडझड झालेल्या घरांची पाहणी करण्यासाठी पुढे निघून गेले .