खोपोली राष्ट्रवादीतील एक गट भाजप- शिवसेनेच्या संपर्कात  ?

खोपोली : खोपोलीतील राष्ट्रवादी काँग्रेस पक्षाचा एक गट सत्ताधारी भाजप व शिवसेनेच्या वरिष्ठ नेत्यांच्या संपर्कात आहे . खोपोलीतील राष्ट्रवादीचे काही  नगरसेवक व वरिष्ठ पदाधिकारी भाजप शिवसेनेत जाण्यासाठीच्या हालचाली सुरू झाल्या आहेत .

खोपोलीत या बाबतीत कोणताही मोठा नेता किंवा लोकप्रतिनिधी उघडपणे काहीही बोलण्यास तयार नाही .मात्र भाजप व शिवसेना सूत्रांकडून मिळालेल्या माहितीनुसार ,  राष्ट्रवादी मधील अनेक नगरसेवक व वरिष्ठ पदाधिकारी पालक मंत्री रविंद्र चव्हाण , सिडको अध्यक्ष आमदार प्रशांत ठाकूर व माजी खासदार रामशेठ ठाकूर यांच्या संपर्कात असल्याचे बोलले जात आहे .तर एक दुसरा गट शिवसेनेत प्रवेशासाठी खासदार श्रीरंग बारणे यांच्या मार्फत वरिष्ठ मंत्री एकनाथ शिंदे व सुभाष देसाई यांच्याशी जवळकी साधून असल्याचा जोरदार प्रचार विविध पातळ्यांवर केला जात आहे .

संभाव्य या राजकीय उलथापालथ मागील मुख्य कारण नगरपालिका मधील आर्थिक कोंडी हे सांगितले जात आहे .सत्ताधारी पक्षच्या मंत्री व वरिष्ठ नेत्यांकडून खोपोली नगरपालिकेला अतिरिक्त निधी देण्यासाठी विविध मार्गाने कोंडी केली जात असल्याची ही चर्चा नगरपालिका स्तरावर सतत होत आहे.संभाव्य राजकीय बंड व सर्व खटाटोप विविध विकास कामांसाठी मुबलक निधी मिळण्यासाठी होत असल्याचे ही बोलले जात आहे .

 मात्र चौकशी केली असता, या कारणांत कोणताही दम नसल्याचे स्पष्ट होते . दुसरीकडे येथील काही लोकप्रतिनिधी व काही वरिष्ठ नेत्यांना पक्ष प्रवेशासाठी व्यक्तिगतपणे मोठया प्रमाणावर आर्थिक लाभ मिळण्याची खात्री दिली जात आहे . त्यासाठीच्या गुप्त चर्चाही विविध पातळ्यांवर सुरू असल्याने,हेच संभाव्य पक्ष बदलाचे मुख्य कारण बनणार आहे .

राष्ट्रवादीच्या काही नगरसेवक व पदाधिकारी यांची संभाव्य पक्ष प्रवेशासाठीची अंतिम तयारी झाली आहे . उर्वरीत काही मोहरे तयार करण्याचे काम सुरू आहे . तर दुसरीकडे राष्ट्रवादी काँग्रेसचे स्थानिक नेते व आमदार सुरेश लाड स्थितीवर लक्ष ठेवून आहेत. येणाऱ्या विधान सभेच्या निवडणुकीपर्यंत , खोपोलीतील राष्ट्रवादीचा  गड  कोणत्याही स्थितीत मजबूत ठेवण्यासाठी त्यांच्या समोर मोठे आव्हान असणार आहे .