’ दारूची बाटली’ लॉकमध्ये ठेवा, मद्यप्रेमींना निर्देश 

नवी दिल्ली : लॉकडाउनच्या काळात घरात बसून कंटाळा आल्याने एकच प्याला तोंडी लावण्याच्या विचारात असाल तर आताच थांबा, कारण तंबाखू सेवन आणि मद्यपान केल्याने रोगप्रतिकार शक्ती कमी होते, त्यामुळे बाहेरचा विषाणू तुमच्यावर थेट वार करू शकतो असा इशारा आरोग्य मंत्रालयाने दिला आहे. 

एखाद्याला कोरोनोचा संसर्ग झाल्याचे तुमच्या निदर्शनास आले असेल तर त्याला खबरदारी घ्यायला सांगा. तसेच वैद्यकीय मदत कशी मिळवता येईल याचेही त्याला मार्गदर्शन करा असे आरोग्य मंत्रालयाने प्रसिद्ध केलेल्या निवेदनामध्ये म्हटले आहे. कोरोनाच्या संसर्ग काळामध्ये मानसिक संतुलन ढळू देऊ नका असेही आरोग्य मंत्रालयाकडून सांगण्यात आले. 

मंत्रालय म्हणते... 
गरज असेल तर घराबाहेर पडा 
घराजवळच्या दवाखान्यांची माहिती घ्या 
संसर्ग झालेल्यांनी घाबरून जाऊ नये 
संगीत ऐका, वाचन करा, 
मनोरंजनात्मक कार्यक्रम पाहा 
वृद्धांना जीवनावश्‍यक वस्तूंसाठी मदत करा 
अफवा पसरवू नका, त्यांच्यावर विश्‍वास ठेवू नका