जितेंद्र आव्हाड यांना त्यांच्या आवडीचे खाते मिळणार

मुंबई : राष्ट्रवादी काॅंग्रेससह इतर दोन पक्षांची संभाव्य मंत्र्यांची आणि त्यांच्या खात्यांची यादी तयार झाली असून राष्ट्रवादीची भूमिका आक्रमकपणे मानणाऱ्या जितेंद्र आव्हाड यांना त्यांचे आवडीचे खाते मिळण्याची शक्यता आहे.

राज्य मंत्रीमंडळाचा विस्तार 23 डिसेंबरनंतर होणार असल्याने त्यावेळी शिवसेना, राष्ट्रवादी कॉंग्रेस आणि कॉंग्रेसच्या महाविकास आघाडी सरकारचा चेहरा स्पष्ट होणार आहे. यासाठी तिन्ही पक्षांमध्ये प्रादेशिक आणि सामाजिक समतोल राखण्याचा खल सुरू असून प्राथमिक माहिती सूत्रांकडून प्राप्त झाली आहे.

राष्ट्रवादी काॅंग्रेसकडून चर्चेत आलेले नाव म्हणजे मकरंद पाटील. वाईचे तीन वेळा आमदार असलेले पाटील यांचे नाव कॅबिनेटच्या संभाव्य नावात आल्याने आश्चर्य व्यक्त होत आहे. राष्ट्रवादीच्या सत्तास्थापनेसाठी झालेल्या काही बैठकांना पाटील यांची उपस्थिती होती. तेव्हाच त्यांना महत्त्वाची जबाबदारी मिळणार असल्याची चर्चा होती. त्यांच्याकडे राष्ट्रवादीसाठी महत्त्वाचे असलेले ग्रामविकास खाते देण्यात येणार आहे. या आधी राष्ट्रवादीकडून आर. आर. पाटील, विजयसिंह मोहिते पाटील, जयंत पाटील यांनी ग्रामविकास खाते सांभाळले होते. आता चौथ्या पाटलांकडे म्हणजे मकरंद यांच्याकडे राष्ट्रवादी हे खाते देणार आहे.

राष्ट्रवादीचे दुसरे प्रमुख नेते अजित पवार आणि दिलीप वळसे पाटील यांचे नाव या संभाव्य यादीत नसल्याचे दिसून येत आहे. आव्हाड हे पृथ्वीराज चव्हाण यांच्या मंत्रिमंडळाच्या अखेरच्या वैद्यकीय शिक्षण खाते सोपविण्यात आले होते. सामाजिक न्यायची भूमिका ते आघाडीवर राहून मांडतात. त्यामुळे त्यांना तेच खाते मिळणार असल्याची चर्चा आहे. 

28 नोव्हेंबर 2019 रोजी मुख्यमंत्री उद्धव ठाकरे यांच्यासह एकनाथ शिंदे, सुभाष देसाई, राष्ट्रवादी कॉंग्रेसचे जयंत पाटील, छगन भुजबळ, कॉंग्रेसचे बाळासाहेब थोरात आणि डॉ. नितिन राउत यांनी मंत्रीपदाची शपथ घेतली. त्यानंतर तब्बल पंधरा दिवसानंतर कोणत्या पक्षांकडे कोणते विभाग असतील याचे वाटप काल गुरूवारी करण्यात आले.

सध्या मंत्रिमंडळात मुख्यमंत्रयांसह सात मंत्री आहेत आणि येत्या 16 डिसेंबर पासून नागपूर येथे हिवाळी अधिवेशन सुरू होणार असल्याने सहा मंत्र्यांकडे सर्व विभागांची जबाबदारी टाकण्यात आली आहे. सहा मंत्रयांकडील खातेवाटप तात्पुरत्या स्वरूपात असून अधिवेशनानंतर मंत्रीमंडळाचा विस्तार होणार आहे. यावेळी मंत्रीमंडळात आमदारांचा समावेश करताना प्रादेशिक आणि सामजिक समतोल राखण्यासाठी शिवसेना, राष्ट्रवादी कॉंग्रेस आणि कॉंग्रेसमध्ये खलबते सुरू आहेत. कोणत्या मंत्र्यांकडे कोणते खाते असेल याबाबतच्या कच्च्या याद्या तयार असून त्याची प्राथमिक माहिती प्राप्त झाली आहे. यात तिन्ही पक्षातीन जुन्या अनुभवी आणि नव्या दमाच्या मंत्रयांचा समावेश असेल असे सूत्रांकडून सांगण्यात आले.

काही मंत्रीपदे रिक्‍त राहणार
तिन्ही पक्षांतील नाराजांना गाजर दाखविण्यासाठी किमान दोन वर्षे उद्धव ठाकरे यांच्या मंत्रीमंडळात काही मंत्रीपदे रिक्‍त ठवेण्यात येणार आहे. राष्ट्रवादी कॉंग्रेस आणि शिवसेनेचे दोन कॅबिनेट व दोन राज्यमंत्रीपदरे रिक्‍त ठेवण्यात येतील. तर कॉंग्रेसच्या कोटयात एक कॅबिनेट व दोन राज्यमंत्रीपदे रिक्‍त ठेवण्यात येणार आहे. हि पदे दोन ते अडीच वर्षांनतर होणा-या मंत्रीमंडळ विस्तारात भरण्यात येणार असल्याचे समजते.

विस्तार आणि संभाव्य खातेवाटप
शिवसेना - 12 कॅबिनेट आणि 4 राज्यमंत्री - एकूण 16
ः- उद्धव ठाकरे - गृह, सामान्य प्रशासन, विधी व न्याय
ः- एकनाथ शिंदे - नगरविकास, संसदीय कार्य,सार्वजनिक बांधकाम - सार्वजनिक उपक्रम
ः- सुभाष देसाई - उद्योग व खनीकर्म
ः- सुनील प्रभू - वने व पर्यावरण
ः-आशिष जैसवाल - पाणीपुरवठा व स्वच्छता
ः- तानाजी सावंत - जलसंधारण, रोजगार हमी
ः- दिपक केसरकर - पर्यटन, मराठी भाषा
ः- रविंद्र वायकर - उच्च व तंत्र शिक्षण
ः- अनिल बाबर - कृषी व फलोत्पादन
ः- गुलाबराव पाटील -परिवहन, माजी सैनिक कल्याण, क्रिडा व युवक कल्याण
....................
राष्ट्रवादी कॉंग्रेस - कॅबिनेट 11 आणि 4 राज्यमंत्री- एकूण 15
ः- जयंत पाटील - वित्त व नियोजन
ः- अनिल देशमुख - अन्न व नगीा पुरवठा
ः- हसन मुश्रीफ - सहकार व पणन
ः- छगन भुजबळ - जलसंपदा व लाभक्षेत्र विकास
ः- नवाब मलिक - गृहनिर्माण, कामगार व अल्पसंख्यांक विकास
ः- डॉ. राजेंद्र शिंगणे - सार्वजनिक आरोग्य
ः- जितेंद्र आव्हाड - सामाजिक न्याय
ः- राजेश टोपे - राज्य उत्पादन शुल्क, कौशल्य विकास
ः- ग्रामविकास - मकरंद पाटील
..........................
कॉंग्रेस - कॅबिनेट 8 आणि 4 राज्यमंत्री - एकूण 12
ः- बाळासाहेब थोरात - महसूल, मदत व पुनर्वसन
ः- पृथ्वीराज चव्हाण - सार्वजनिक बांधकाम
ः- अशोक चव्हाण - उर्जा, अपारंपारीक उर्जा
ः- विजय वडेटीवार - आदिवासी विकास, वस्त्रोद्योग
ः- सतेज पाटील - शालेय शिक्षण व वैद्यकीय शिक्षण
ः- डॉ. नितिन राउत - पशुसंवर्धन व दुग्धविकास
ः- वर्षा गायकवाड - महिला व बालविकास