पूरग्रस्तांना शासनाने नशिबाच्या हवाल्यावर सोडले : हसन मुश्रीफ यांची टीका

कोल्हापूर : गेले आठवडाभर प्रचंड अतिवृष्टी होऊन उद्भवलेल्या गंभिर पुर परिस्थितीमध्ये शासनाने पूरग्रस्तांना त्यांच्याच नशिबाच्या हवाल्यावर सोडले, असा घणाघात आमदार हसन मुश्रीफ यांनी केला . शासनाच्या ढिसाळ प्रशासनाबद्दल त्यांनी तीव्र संताप व्यक्त केला.

ते म्हणाले, गेले सहा ते सात दिवस जिल्ह्यामध्ये अतिवृष्टी होत आहे . हवामान खात्याने 11 ऑगस्ट पर्यंत अतिवृष्टीचे स्पष्ट संकेत देऊन सुद्धा शासनाने त्याकडे अक्षम्य दुर्लक्ष केले आहे . वास्तविक , एनडीआरएफच्या तुकड्या व बोटी यापूर्वीच आणून ठेवणे आवश्यक होते . असे असताना शासनाने लाखो पूरग्रस्तांना त्यांच्याच नशिबाच्या हवाल्यावरच सोडून दिले.

``माणसांबरोबरच मुक्या जनावरांचे हाल यापूर्वी कधीच इतके झाले नव्हते . जिल्ह्यामध्ये एवढा हाहाकार उडाला असताना आणि निम्म्या कोल्हापूर शहरासह करवीर तालुका , शिरोळ तालुका , कागल तालुका आणि गडहिंग्लज तालुका व इतरही तालुक्यातील अनेक गावातील गल्ल्याच्या गल्ल्या स्थलांतरित झालेल्या आहेत. त्यांना ना पाणी, ना जेवण , ना आरोग्याच्या सुविधा अशी दुरावस्था आहे. तशातच वीज पुरवठाही बंद आहे . अशी भयानक परिस्थिती उद्भवली असताना शेकडो वेळा पालकमंत्री हेलिकॉप्टरने व विमानाने कोल्हापूरला ये -जा करीत असताना यावेळी पाणी त्यांच्या आडवे यावे , हे आश्चर्यजनक आहे, असा टोला त्यांनी लगावला.

कोल्हापूर शहर , प्रयाग चिखली , आंबेवाडी व शिरोळ तालुक्यातील जनता फार मोठ्या संकटात सापडलेली आहे. या महाप्रलयात स्थानिक लोकप्रतिनिधी , स्थानिक स्वराज्य संस्था, तरुण मंडळे आणि सेवाभावी संस्था यांनी जे काम केले त्याबद्दल त्यांना सॅल्यूट! अशातच कोल्हापूर शहराच्या पुररेषेबाबत 30 ते 40 कोटी रुपयांचा व्यवहार झाल्याची चर्चाही नागरिक करीत आहेत . याबाबत शासनाने तात्काळ 
कठोरपणाने निर्णय घेण्याची आवश्यकता आहे . या परिस्थितीत लहान -लहान चिमुकली , गरोदर भगिनी , म्हातारी माणसे यांना बाहेर काढताना त्यांच्या चेहऱ्यावर भीतीची छाया पाहिल्यानंतर त्यांच्या जीवनाशी खेळण्याचा आम्हाला काय अधिकार आहे ? काल मंगळवारी दी.६ सकाळी मी व्हिडिओ व्हायरल करून मुख्यमंत्र्यांना दौरा स्थगित करून पश्चिम महाराष्ट्रामध्ये विशेषत: कोल्हापूर जिल्ह्यातील पूर परिस्थितीबाबत तात्काळ उपाययोजना करण्याची विनंती केली होती . बहुतांशी इलेक्ट्रॉनिक माध्यमांनी तो माझा व्हिडिओ प्रसारित केला, अशे त्यांनी सांगितले.

पूरग्रस्तांना दिलासा देण्याबाबत निर्णय घेण्याची आवश्यकता आहे . स्थलांतरीत व इतर नागरिकांना जीवनावश्यक वस्तूंचा पुरवठा, खावटी , रोख रक्कम , पिण्याचे पाणी , औषधे , सिलेंडर , जेवणाची व रहाण्याची व्यवस्था तात्काळ करण्यात यावी . तसेच , पाऊस संपल्यानंतर ज्या घरांची पडझड किंवा नुकसान झाले ती नुकसान भरपाई व उध्वस्त पिकांचे पंचनामे करून त्यांना नुकसान भरपाई व आर्थिक मदत इत्यादी निर्णय अपेक्षित आहेत, असे त्यांनी सुचविले.

अद्यापही प्रयाग चिखली , आंबेवाडी व शिरोळ तालुक्यातील काही गावांमध्ये अडकलेली माणसे आणि जनावरे अक्षरशा टाहो फोडीत आहेत . त्यांचे जे हाल होत आहेत, त्या नाकर्तेपणाला फक्त आणि फक्त शासनच जबाबदार आहे. पावसाचा हा जोर आणि सातत्य असेच राहिल्यास भयानक परिस्थिती ओढवू शकते . याबाबत शासनाने दक्षता घ्यावी, असे आवाहन त्यांनी केले.

यापूर्वी 2005 साली असा भयानक महापूर आला होता. त्यापेक्षा जास्त तीव्रतेचा महाप्रलय 1983 साली आला होता . परंतु; या वर्षीचा महाप्रलय 1983 पेक्षा जादा भयंकर वाटावा असेच जाणवते , असे मुश्रीफ म्हणाले .