परिवर्तनाच्या लढ्याला बळ द्यावे - के. पी. पाटील

सोळांकूर : मतदारसंघातील सिंचनाचे प्रकल्प प्रलंबित असताना केवळ प्रशासकीय मान्यतेच्या कागदावर नारळ फोडणाऱ्यांनी जनतेला खुळे समजू नये, असा टोला के. पी. पाटील यांनी प्रकाश आबिटकरांचे नाव न घेता लगावला. परिवर्तनाच्या या लढ्याला बळ द्यावे, असे आवाहनही त्यांनी केले. 

गवशी येथे प्रचार दौऱ्यातील सभेत ते बोलत होते. अध्यक्षस्थानी कृषी उत्पन्न बाजार समितीचे संचालक सर्जेराव पाटील गवशीकर होते. 

जि. प.चे सदस्य विनय पाटील म्हणाले, ""के. पी. पाटील यांनी गेल्या दहा वर्षांत केलेल्या विकासाची नोंद घेत धामोड खोऱ्याचा प्रलंबित प्रश्न सोडवण्यासाठी प्रयत्न केले. त्यामुळे के. पी. पाटील हेच सक्षम पर्याय आहेत. आपण सर्वांनी त्यांना मदत करून विकासाचे स्वप्न साकार करूया.'' 

बाजार समितीचे संचालक सर्जेराव पाटील म्हणाले, ""धामोड खोऱ्यातील पायाभूत प्रश्नांचे आकलन फक्त के. पी. पाटील यांना आहे. या परिसरातील धामणी जलाशयाचा प्रश्न आजही प्रलंबित आहे. महत्त्वपूर्ण प्रश्नांची सोडवणूक करण्यासाठी परिवर्तनाच्या रॅलीत सहभागी व्हावे.'' 

जिल्हा राष्ट्रवादी कॉंग्रेसचे अध्यक्ष ए. वाय. पाटील, भोगावतीचे माजी चेअरमन धैर्यशील पाटील, पी. डी. धुंदरे, संजय कलिकते, उमेश भोईटे, मोहन पाटील, विलास भित्तम, गणपती भित्तम, संजय भित्तम, देवबा भित्तम, सर्जेराव चौगले, राजेंद्र पाटील, खंडू सावंत, विलास सावंत, दगडू माने उपस्थित होते. के. पी. पाटील यांनी राधानगरी तालुक्‍यातील गवशी, कोनोलीतर्फे पाटीलवाडी, कुपलेवाडी, पकालेवाडी, खामकरवाडी आदी गावांचा संपर्क दौरा केला.