पोलिसांची गांधीगीरी... आज गुलाब घ्या...पुन्हा दिसलात प्रसाद देऊ!   - Gandhigiri By Ozar Police to Stop People coming on Roads | Politics Marathi News - Sarkarnama

ब्रेकिंग न्यूज

खासदार संभाजीराजे छत्रपती यांनी मराठा समाजासाठी केलेल्या मागण्या मान्य करण्याची राज्य सरकारची तयारी
मुख्यमंत्री उद्धव ठाकरे व खासदार संभाजीराजे छत्रपती यांची उद्या (17 जून) पाच वाजता वर्षा निवासस्थानी महत्वपूर्ण बैठक
कोल्हापूर : खासदार संभाजीराजे यांच्या नेतृत्वाखाली मराठा आरक्षणासाठी मूक आंदोलनास सुरवात

पोलिसांची गांधीगीरी... आज गुलाब घ्या...पुन्हा दिसलात प्रसाद देऊ!  

सरकारनामा ब्युरो
शनिवार, 28 मार्च 2020

लाॅकडाऊनच्या पार्श्वभूमीवर वारंवार विविध प्रकारे विनंती व सुचना देऊनही काही ठराविक लोकांकडून त्याचे उल्लंघन होतेच. त्यावर ओझर पोलिसांनी गांधीगिरीचा उपाय केला

ओझर : शासनेने लॉकडाऊन जाहीर केले आहे. तरीही अनेक विनाकारण घराबाहेर पडतातच. अनेकदा सांगूनही योग्य परिणाम होत नाही. त्यामुळे येथील पोलिसांनी आता वेगळीच शक्कल लढवली आहे. घराबाहेर पडणाऱ्यांची प्रेमाने चौकशी करुन गुलाबपुष्प देत गांधीगीरी सुरु केली आहे. 'दादा, घराबाहेर पडू नका. आज गुलाबाचे फुल देऊन स्वागत करतो आहे. पुन्हा दिसलात तर मात्र....वेगळे स्वागत होईल' असा प्रयोग सुरु केल्याने त्याचा चांगलाच परिणाम दिसू लागला आहे.

लाॅकडाऊनच्या पार्श्वभूमीवर वारंवार विविध प्रकारे विनंती व सुचना देऊनही काही ठराविक लोकांकडून त्याचे उल्लंघन होतेच. अशा लोकांकडे कारणांचा तुटवडा नाही. लोक अशी कारणे सांगतात की पोलिसही निरुत्तर होतात. त्यामुळे प्रशासन अक्षरशः वैतागले आहे. त्यामुळे विचारपूस न करता वेगळाच उपक्रम पोलिसांनी ओझर, एचएएल वसाहत असलेल्या ओझरटाऊनशिप परिसरातील नागरिकांसाठी सुरु केला आहे. पोलिस निरिक्षक भगवान मथुरे व त्यांच्या सहकाऱ्यांनी वेगवेगळ्या भागात जाऊन 'लॉकडाऊन'चे महत्व व त्याचे उल्लंघन केल्यास समाजाला होणारा धोक्‍याची माहिती देत जनजागृती केली. नागरिकांनी घरातच थांबावे असे आवाहन केले. त्याला चांगला प्रतिसाद मिळाला.

या उपक्रमानंतर देखील काही ठराविक मंडळी विविध कारणे देत बाहेर हिडतांना दिसतात. त्यावर त्यांनी गांधीगिरीचा उपाय केला. दंडुक्‍याचा वापर न करता पोलीस निरिक्षक भगवान मथुरे, सहाय्यक पोलिस उपनिरिक्षक विजय गायकवाड, हवालदार चौगुले, श्री. खांडवी, बाळासाहेब पानसरे, भास्कर पवार, अरूण गायकवाड, भुषण शिंदे, अनूप जाधव, श्री. अहिरराव आदिंनी शुक्रवारी दिवसभर गांवातील रस्त्यावर फिरून विनाकारण रस्त्यावर फिरणारे दुचाकीस्वार, वाहनचालक, पादचाऱ्यांना थांबवून गुलाबपुष्प देत 21 दिवस घरातच थांबण्यासाठी समजावले. शेवटी 'आज गुलाब घ्या. पुन्हा दिसलात तर वेगळा प्रसाद मिळेल. सोबत कारवाई करु ती वेगळी' असा कडक इशारा दिला.

ओझर गावातील मशीदीचे मौलाना व ट्रस्टी याना समक्ष भेटून गुलाबपुष्पे देऊन शासनाचे जमावबंदी आदेशाचे पार्श्वभूमीवर मशीदीत नमाजसाठी गर्दी करू नये, लोकांनी घरातच नमाज अदा करावी बाबत सुचना दिल्या. तरीही जर मशीदीत गर्दी केल्याचे दिसून आल्यास संबंधीतांवर गुन्हे दाखल केले जातील, अशा स्पष्ट सुचना दिल्या. त्याचा चांगला परिणाम दिसून येत आहे. 

 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख