यवतमाळ : आयुषी देशमुख यांच्या वडिलांच्या नावे असलेला भूखंड हस्तांतरित करून फसवणूक केल्याप्रकरणी यवतमाळचे पालकमंत्री मदन येरावार यांच्यासह इतर 17 जणांविरुद्ध काल रात्री उशीरा 420, 426, 465, 468, 471, 34, 120 बी कलमान्वये गुन्हे दाखल करण्यात आले. चौथे दिवाणी व फौजदारी न्यायाधीश राजकिरण इंगळे यांनी मंगळवारी अवधूतवाडी पोलिसांना गुन्हे दाखल करण्याचे आदेश दिले होते.
यात पालकमंत्री येरावार यांच्यासह जिल्हा परिषद सदस्य चित्तरंजन कोल्हे, माजी मंत्री संजय देवतळे यांच्या पत्नी राजश्री, सट्टा किंग व मुख्याधिकारी, भूमिअभिलेख अधिकारी व सहाय्यक दुय्यम निबंधक आदींचा समावेश आहे. या प्रकरणात प्रतिष्ठातांची नावे आल्याने एकच खळबळ उडाली आहे.
फिर्यादी आयुषी हिचे वडील किरण देशमुख यांनी दोन भूखंड 22 एप्रिल 1999 व 5 फेब्रुवारी 2002 रोजी खरेदी केला होता. त्यानंतर त्याचे मालमत्ता कार्ड क्रमांक 1657 तयार करण्यात आले. परंतु, यातील आरोपींनी बनावट दस्त तयार करून मूळ मालकाचे नाव गायब केले. फिर्यादीचे वडील दिवंगत किरण देशमुख यांच्या मालकीचा प्लॉट नं. 22 मध्ये असलेल्या त्यांच्या अविभक्त हिस्सा बळकावून त्यांची परस्पर विल्हेवाट लावली.
याबाबत फिर्यादी आयुषी देशमुख यांनी न्यायालयात दाद मागितली. सर्वांचा उद्देश हा फसवणूक करण्याचा असल्याने याप्रकरणी सर्वांविरुद्ध गुन्हे नोंदविण्याचे आदेश अवधूतवाडी पोलिसांना देण्यात आले. त्यानुसार आयुषी देशमुख (रा. बाजोरियानगर, यवतमाळ) यांनी चित्तरंजन गुणवंतराव कोल्हे (54, जिल्हा परिषद सदस्य, रा. झाडगाव ता. राळेगाव), जयश्री दिवाकर ठाकरे (63, रा. उमरेड, जि. नागपूर), विजयश्री विजयराव कारेकर (57, रा. राणाप्रतापनगर, नागपूर), जयंत गुणवंतराव कोल्हे (50, नेल्को सोसायटी, नागपूर), राजश्री ऊर्फ श्‍वेता संजयराव देवतळे (49, रा. वरोरा, जि. चंद्रपूर), तेजश्री विजय थुटे (44, वर्धा), दिलीप अनंतराव कोल्हे (55, रा. बाजोरियागनर, यवतमाळ), अर्चना शशिशेखर कोल्हे (52), आशीष शशिशेखर कोल्हे (32), वैशाली बाळासाहेब कोल्हे (52), अमोल बाळासाहेब कोल्हे (30, रा. बाजोरियानगर यवतमाळ), शीतल रवी धोटे (29, रा. राजुरा, जि. चंद्रपूर), मदन मधुकर येरावार (55, रा. अवधूतवाडी, यवतमाळ), अमित कमलकिशोर चोखाणी (34 यवतमाळ), तत्कालीन अधिकारी, उपअधीक्षक भूमिअभिलेख कार्यालय यवतमाळ, तत्कालीन मुख्याधिकारी, राजेश मोहिते, नगरपालिका यवतमाळ, तत्कालीन सहायक दुय्यम निबंधक क्रमांक 1 नोंदणी कार्यालय, यवतमाळ यांच्याविरुद्ध गुन्हे नोंदविण्याची विनंती आयुषी यांनी केली होती.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.