शनिदेवाला हात जोडतो.. म्हणत फडणवीस यांनी घेतले चौथऱ्याखालून दर्शन

सोनई (नगर) : स्वयंभू शनिमुर्तीच्या या भुमीत मोठी उर्जा असून, दर्शनाने मनाला बरं वाटलं. शनिदेवाला येथूनच हात जोडतो, असे म्हणत माजी मुख्यमंत्री देवेंद्र फडणवीस यांनी शिंगणापूर येथे शनिदेवाचे चौथऱ्यावर न जाता खालूनच दर्शन घेतले.

औरंगाबादहून पुण्याकडे जाताना फडणवीस कुणालाच पूर्वसूचना न देता अचानक रात्री शनिशिंगणापुरला आले. त्यांनी उदासी महाराज मठात सुखशांती करीता नियमीत होणारा अभिषेक करुन स्वयंभू शनिमुर्तीचे चौथ-याखालून दर्शन घेतले. शनैश्वर देवस्थान ट्रस्टच्यावतीने कोषाध्यक्ष योगेश बानकर व विश्वस्त अदिनाथ शेटे यांनी त्यांचा शाल, श्रीफळ व प्रसाद देवून सत्कार केला. या वेळी सरपंच बाळासाहेब बानकर, संदीप अट्टल उपस्थित होते.

शनिदेवा हात जोडीतो

फडणवीस यांनी अभिषेक केल्यानंतर त्यांना पुरोहित विशाल कुलकर्णी यांनी शनि मूर्तीला तेल अर्पण करण्यासाठी चौथ-यावर जाण्याची विनंती केली असता, 'शनिदेवा हात जोडीतो' म्हणत त्यांनी इतर भक्तांप्रमाणे चौथ-याखालूनच दर्शन घेतले.