संजय राऊतांचे ट्वीटर टोमणे सुरुच

मुंबई : या आधी ज्यांच्याकडे सत्ता होती, त्यांना आपण भगवान असल्याचा प्रचंड अहंपणा होता, असे सांगत शिवसेना नेते व खासदार संजय राऊत यांनी भाजपला टोमणे मारणे सुरुच आहे. आपल्या ट्वीटर हँडलवरुन राऊत यांनी एक शेर सादर करत भाजपला टोमणा मारला आहे. 

गेल्या काही दिवसांपासून राऊत यांनी ट्वीटरच्या माध्यमातून भाजपवर शरसंधान सुरु ठेवले आहे. आज त्यांनी  हबीब जालिब यांच्या शायरीचा आधार घेत भाजपवर निशाणा साधला आहे.
तुम से पहले वो जो इक शख़्स यहाँ तख़्त-नशीं था 
उस को भी अपने ख़ुदा होने पे इतना ही यक़ीं था
.......असे ट्वीट राऊत यांनी केले आहे. 

दरम्यान, नवी दिल्लीत संसदेचे अधिवेशन सुरु होत आहे. त्यामुळे आता महाराष्ट्रातील सत्तास्थापनेच्या हालचालींचे केंद्र दिल्ली असणार आहे. आज शिवसेनेला पाठिंबा देण्याबाबत काँग्रेस अध्यक्ष सोनिया गांधी व राष्ट्रवादी काँग्रेसचे अध्यक्ष शरद पवार यांच्यात चर्चा होण्याची शक्यता आहे. त्यानंतर राऊत पवार यांची भेट घेतील असे सूत्रांनी सांगितले आहे.