नाथाभाऊंच्या जागी कन्या रोहिणीना संधी,तर तावडे -बावनकुळेंना जीवदान?

मुंबई :  एकनाथ खडसे यांनी थांबावे असा सल्ला देत त्यांची कन्या रोहिणीला भाजपने उमेदवारी देण्याची तयारी दाखवली आहे.

मात्र एकनाथ खडसेंना आपल्या राजकीय कारकीर्दीची अखेर सन्मानपूर्वक व्हावी असे वाटते आहे . खडसे यांच्याविषयी सहानुभूती असलेल्या काही नेत्यांनी नाथाभाऊला राज्यपाल तरी करावे असे यासाठी मोर्चेबांधणी सुरु केली आहे . मात्र सध्या तरी खडसेंना कन्येला मिळणाऱ्या तिकिटावर समाधान मानावे लागेल अशी चिन्हे आहेत . 

विनोद तावडे यांनी आजवर पक्षासाठी केलेले काम लक्षात घेत त्यांच्याविषयी जीवदानाचे धोरण अवलंबवले जाण्याची शक्यता आहे. विनोद तावडे यांनी अभाविपच्या दिवसांपासून संघटनेत काम केलेले आहे . शिवाय तावडे एकदमच बाजूला पडले तर आशिष शेलार यांची सुसाट वाटचाल सुरु होऊ शकते . तावडे यांचे महत्व राहिले तर मुबई भाजपत सत्तासमतोल कायम राहू शकेल असे काहींना वाटते . 

बावनकुळे यांना उमेदवारी मिळावी या साठी मुख्यमंत्री फडणवीस प्रयत्नशील आहेत असे समजते. बावनकुळे यांना राष्ट्रवादी काँग्रेसच्या अनिल देशमुखांविरुद्ध लढण्याची संधी आग्रहपूर्वक दिली जाईल अशी चर्चा आहे .

प्रकाश महेता यांच्याऐवजी पराग शहा किंवा प्रवीण छेडा यांचा विचार सुरू आहे.