आयुक्त सुनिल केंद्रेकर म्हणाले, मी घरचा डबा आणला आहे !

गेवराई (जि. बीड) : बडा अधिकारी दौऱ्यावर आल्यानंतर कामाचा ताण कमी पण इंतेजाम करता करता नाकी नऊ येतात. जेवण दुपारचे असो कि रात्रीचे चिकन - मटन  किंवा शाकाहारी महागडा सुकामेवा असा शाही बंदोबस्त करण्याचा रिवाज आहे .  गुरुवारी अचानक दौऱ्यावर आलेल्या विभागीय आयुक्त सुनिल केंद्रेकर यांच्या दुपारच्या भोजनाची अधिकाऱ्यांनी जय्यत तयारी केली. परंतु, मी, घरचा डबा आणला आहे, तुम्ही जेवून घ्या असे म्हणत वाहनात बसून त्यांनी औरंगाबादचा रस्ता धरला. 

मागच्या काही वर्षांपूर्वी जिल्ह्यात जिल्हाधिकारी म्हणून सुनिल केंद्रेकर यांची कारकिर्द गाजली आणि बीडकरांच्या कायम स्मरणात राहील अशीच राहीली. विंधन विहिरीत पडलेल्या बालकाला वाचविण्यासाठी दोराला धरुन उतरणे असो कि एखाद्या ठिकाणी जाऊन सिंघम स्टाईल कारवाईमुळे ते लोकप्रियही होते. पण, त्यांचा कामाच्या खाक्यामुळे महसूलमधील कनिष्ठ कर्मचाऱ्यांची चांगलीच धांदल उडत असते. 

दरम्यान, गुरुवारी त्यांनी अचानक तहसिल कार्यालयाला भेट देऊन आढावा घेतला. त्यानंतर त्यांनी अचानक मतदान केंद्रांची पाहणी करण्यासाठी जिल्हा परिषद शाळेकडे मोर्चा वळविला. मुख्याध्यापकाला विचारुन प्रयोगशाळा खोलीत जाऊन पाहतात तर काय सर्व उपकरणांवर बसलेली धुळ !

हे पाहून त्यांनी आपल्या शैलित प्रयोगशाळा सुधारा अशा सुचना दिल्या. त्यानंतर त्यांनी जाण्यासाठी निघाल्यानंतर प्रभारी जिल्हाधिकारी प्रवीण धरमकर व तहसीलदार चव्हाण यांनी शासकीय विश्रामगृहात जेवायला चला म्हणून आग्रह धरला. परंतू केन्द्रेकर यांनी नकार देत ‘मी घरून डबा आणला आहे, तुम्ही जेवून घ्या’, असे सांगत औरंगाबादच्या दिशेने प्रयाण केले.