कोल्हापूर : राष्ट्रवादी कॉंग्रेसमधून अलिकडेच भाजपात प्रवेश केलेले माजी खासदार धनंजय महाडिक यांच्या तोंडी अजूनही 'घड्याळ' च असल्याने त्यांनी भाजप उमेदवारांच्या प्रचार सभेत 'कमळ' ऐवजी 'घड्याळ' चिन्हासमोरील बटन दाबण्याचा उल्लेख अनावधानाने केल्याने एकच खळबळ उडाली. बरीच वर्षे मी घड्याळासोबत होतो, पण या मतदार संघात घड्याळच नाही असा खुलासा करून त्यांनी यावर पडदा टाकला.
श्री. महाडिक यांचे चुलत बंधू आमदार अमल महाडिक हे कोल्हापूर दक्षिण मतदार संघात भाजपाचे उमेदवार आहेत. बुधवारी (ता. 9) रात्री नऊच्या सुमारास त्यांच्या प्रचारार्थ गोकुळ शिरगांव येथे माजी खासदार महाडिक यांच्या उपस्थितीत जाहीर सभा होती. यात श्री. महाडिक यांनी विरोधकांवर जोरदार टिका करताना त्यांच्याकडून द्वेषाचे व दबावाचे राजकारण सुरू असले तरी लोक त्यांना स्विकारणार नाहीत. या राजकारणाला येत्या 21 तारखेला उत्तर देताना अमल महाडिक यांच्या नावांसमोरील घड्याळाचे बटन दाबा असे त्यांनी आव्हान करताच सभेला उपस्थित लोकही आवाक्‌ झाले.
झालेली चूक लक्षात येताच श्री. महाडिक यांनी माफी मागत श्री. महाडिक यांचे 'कमळ' चिन्ह असल्याचे सांगितले. मी बरीच वर्षे घड्याळासोबत होतो त्यामुळे असे झाले पण काय चिंता करायची गरज नाही इथे घड्याळ चिन्हच नाही असे सांगत दुसऱ्या क्षणी त्यांनी चूक दुरूस्त केली.
या सभेला माजी महापौर शिवाजीराव कदम, माजी सरपंच बाबुराव पाटील, एम. एस. पाटील, राजन पाटील आदि उपस्थित होते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.