शिवसेना निर्णायक टप्प्यावर; संजय राऊतांची राहूल- प्रियंकासोबत दिल्लीत खलबतं

नवी दिल्ली : आगामी पाच राज्यांमध्ये होणाऱ्या निवडणुकीच्या पार्श्वभूमीवर शिवसेना (Shivsena) निर्णायक टप्प्यावर आली‌ आहे. भाजपची साथ सोडल्यावर आता शिवसेना संयुक्त पुरोगामी आघाडीमध्ये ( congress) सहभागी होण्याच्या वाटेवर चालू लागल्याची चर्चा सध्या राजकीय वर्तुळात सुरु आहे.

अशातच शिवसेना खासदार संजय राऊत (Sanjay Raut) उद्या (७ डिसेंबर) कॉंग्रेस खासदार राहूल गांधी (Rahul Gandhi) आणि परवा (८ डिसेंबर) कॉंग्रसेच्या सरचिटणीस प्रियंका गांधी-वाड्रा (priyanka gandhi-vadra) यांची भेट घेणार आहेत. शिवसेना यूपीएमध्ये सहभागी होण्याच्या हालचाली वाढल्या असून, शिवसेना राष्ट्रवादी काँग्रेस पाठोपाठ काँग्रेसशी जवळीक करू लागल्याचेही समोर आले आहे. पाच राज्यांच्या निवडणुकांच्या पार्श्वभूमीवर ही भेट महत्त्वाची मानली जात आहे.

दरम्यान, गेल्या आठवड्यात पश्चिम बंगालच्या मुख्यमंत्री ममता बॅनर्जी महाराष्ट्राच्या दौऱ्यावर आल्या होत्या. यावेळी त्यांनी कॉंग्रेसला वगळून देशात नवी आघाडी बनवण्यासाठी भूमिका मांडली होती. तर तृणमूल काँग्रेस व इतर काही राजकीय पक्षांकडून काँग्रेसवर युपीए आघाडीच्या मुद्यावरून सातत्याने टीकाही करत होते. मात्र, शिवसेनेने मुखपत्र 'सामना'च्या अग्रलेखातून युपीए आघाडीचे समर्थन देत कॉंग्रेसशिवाय नवी आघाडी शक्य नसल्याची ठाम भूमिका घेतली. त्यानंतर आता संजय राऊत हे राहुल गांधी आणि प्रियांका गांधी यांची भेट घेणार आहेत.

संसदेच्या पावसाळी अधिवेशनादरम्यान संजय राऊत यांनी दिल्लीत राहुल गांधी यांचीही भेट घेतली होती. त्यानंतर संजय राऊत यांच्या काँग्रेसच्या वरिष्ठ नेतृत्वासोबतही अगदी सहजतेनं आणि वारंवारपणे भेटी होत आहेत. आगामी निवडणूकांच्या दृष्टीने उत्तर प्रदेश हे भाजपसाठी अत्यंत महत्त्वाचं राज्य मानलं जाते. युपीमध्ये शिवसेनेची फारशी ताकद नसली तरी शिवसेना या निवडणूकीत कॉंग्रेसला साथ देणार का हे पाहणे देखील महत्त्वाचे ठरणार आहे. युपीच्या या निवडणुकीत भाजप हिंदुत्वाचा मुद्द्यावर भाजपचा प्रतिवाद करण्यासाठी शिवसेनेची कॉंग्रेसला मोठी मदत होऊ शकते, असा अंदाज बांधला जात आहे.