तर पूनावालांना धमकी देणाऱ्यांवर आम्ही कारवाई करु; गृहराज्यमंत्री शंभूराज देसाईंची भूमिका

नवी दिल्ली : जगातील सर्वांत मोठी लस उत्पादक कंपनी सिरम इन्स्टिट्यूट ऑफ इंडियाचे मुख्य कार्यकारी अधिकारी अदर पूनावाला यांनी देशातील बड्या व्यक्तींकडून धमक्या मिळत असल्याचा गौप्यस्फोट केला होता. यामुळे पत्नी आणि मुलांसह ते लंडनमध्ये गेले आहेत. यावर गृहराज्यमंत्री शंभूराज देसाई यांनी पूनावालांना लेखी तक्रार करण्याचे आवाहन केले आहे. धमकी देणाऱ्यांवर आम्ही कारवाई करु, असा शब्दही त्यांनी दिला आहे. 

अदर पूनावाला यांना नुकतीच केंद्र सरकारने 'वाय' दर्जाची सुरक्षा दिली आहे. काही राज्यांच्या मुख्यमंत्र्यांसह बड्या व्यक्तींकडून धमक्या येत असल्याचा गौप्यस्फोट पूनावाला यांनी केला होता. याविषयी बोलताना गृहराज्यमंत्री शंभूराज देसाई म्हणाले की, अदर पूनावाला यांनी आमच्याकडे लेखी तक्रार करावी. यात धमकी देणाऱ्यांची नावे त्यांनी आम्हाला द्यावीत. त्या धमकी देणाऱ्यांवर आम्ही कठोरात कठोर कारवाई करु. 

हेही वाचा : देशातील कोरोना लस टंचाई आणखी दोन ते तीन महिने राहणार 

अदर पूनावाला  यांनी ब्रिटनमधील 'द टाईम्स'ला दिलेल्या मुलाखतीवरुन मोठा गदारोळ सुरू आहे. पूनावाला यांनी कुंभमेळा आणि भारतातील निवडणुकांबाबत बोलण्यास या मुलाखतीत नकार दिला आहे. हे दोन्ही विषय संवेदनशील आहेत आणि धमक्या येत असल्याने यावर बोलणार नाही. मी खरे बोललो तर माझे शिर धडावेगळे होईल, असे पूनावालांनी म्हटले आहे. देशातील परिस्थिती एवढी बिघडेल, असे देवालाही वाटले नसेल, असेही त्यांनी म्हटले आहे. देशातील चार राज्ये आणि एका केंद्रशासित प्रदेशातील विधानसभा निवडणुकांमध्ये कोरोनाचा प्रादुर्भाव वाढला अशी टीका सुरू आहे. याविषयी पूनावालांना विचारणा करण्यात आली होती. 

या मुलाखतीत पूनवालांनी म्हटले आहे की, सिरम दुसऱ्या देशात आता लस उत्पादन प्रकल्प सुरू करणार आहे. याबाबतची घोषणा पुढील काही दिवसांत होईल. माझ्या खांद्यावर सध्या मोठे ओझे आहे. भारतातील काही शक्तिशाली व्यक्ती मला धमक्या देत आहेत. यामुळे पत्नी आणि मुलांसमवेत लंडनमध्ये आलो आहे. कोव्हिशिल्ड लशीसाठी अनेक राज्यांचे मुख्यमंत्री, उद्योगपती मला धमकीचे कॉल करीत आहेत. 

हेही वाचा : दिलासादायक : देशातील कोरोना रुग्णसंख्येत सलग दुसऱ्या दिवशी घट 

सिरमने इतर देशांसोबत लस पुरवठ्यासाठी करार केले होते. या करारानुसार या देशांना लसपुरवठा करण्यात अडचणी येत आहेत. त्यामुळे इतर देशांमध्ये उत्पादन प्रकल्प सुरू करण्याचे नियोजन सिरमने केले आहे. याबद्दलची घोषणा अदर पूनावाला लवकरच करणार आहेत. सिरमचा उत्पादन प्रकल्प ब्रिटनमध्येच सुरू होण्याची शक्यता आहे. 

ब्रिटनने भारतीय प्रवाशांवर बंदी घालण्याआधीच आठ दिवसांपूर्वी अदर पूनावाला हे पत्नी आणि मुलांसमवेत लंडनमध्ये दाखल झाले आहेत. सिरमची लस उत्पादनाची क्षमता जुलैपर्यंत दरमहा 10 कोटी डोसपर्यंत जाऊ शकेल. पुढील सहा महिन्यांत सिरमची वार्षिक उत्पादन क्षमता अडीच अब्ज डोसवरुन 3 अब्ज डोसवर नेण्याचा प्रयत्न आहे, असेही पूनावालांनी म्हटले होते. 

देशात कोव्हिशिल्ड आणि कोव्हॅक्सिन या दोन लशींचा वापर लसीकरणासाठी होत आहे. सिरम इन्स्टिट्यूट ही कोव्हिशिल्ड या कोरोना लशीचे उत्पादन करीत आहे. ही लस ऑक्सफोर्ड युनिव्हर्सिटी आणि अॅस्ट्राझेन्का यांनी विकसित केली आहे. दुसरी लस ही भारत बायोटेकची कोव्हॅक्सिन ही आहे. आता रशियाच्या स्पुटनिक व्ही या लशीच्या आपत्कालीन वापरासही केंद्र सरकारने परवानगी दिली आहे. 

Edited by Sanjay Jadhav