अर्णब गोस्वामींच्या अडचणीत वाढ...रिपब्लिक टीव्हीच्या वरिष्ठ अधिकाऱ्यालाही अटक - Senior Republic TV executive arrested by Mumbai Police in fake TRP scam | Politics Marathi News - Sarkarnama

अर्णब गोस्वामींच्या अडचणीत वाढ...रिपब्लिक टीव्हीच्या वरिष्ठ अधिकाऱ्यालाही अटक

वृत्तसंस्था
मंगळवार, 10 नोव्हेंबर 2020

रिपब्लिक टीव्हीचे संपादक अर्णब गोस्वामी यांच्या अटकेवरुन गदारोळ सुरू आहे. आता पोलिसांनी रिपब्लिक टीव्हीच्या वरिष्ठ अधिकाऱ्याला अटक केली आहे. 

मुंबई : मुंबई पोलिसांनी नुकतेच बनावट टीआरपी मिळवण्याबाबतचे रॅकेट उद्‌ध्वस्त केले होते. त्यात रिपब्लिक भारत, फक्त मराठी आणि बॉक्‍स सिनेमा या तीन चॅनेलचा समावेश होता. त्यांनी बनावट पद्धतीने टीआरपी मिळवल्याचे समोर आले आहे. या प्रकरणी रिपब्लिक टीव्हीचे सहउपाध्यक्ष धनश्यामसिंह यांना मुंबई पोलिसांनी अटक केली आहे. यामुळे दुसऱ्या एका गुन्ह्यात अटक असलेले रिपब्लिक टीव्हीचे संपादक अर्णब गोस्वामी यांच्यासमोरील अडचणीत वाढ झाली आहे. 

बनावट टीआरपी प्रकरणात अर्णब गोस्वामी अडचणीत आले होते. यात रिपब्लिक टीव्हीच्या अधिकाऱ्यांचीही चौकशीचा फेरा सुरू झाला होता. त्यांनी या प्रकरणी मुख्यमंत्री उद्धव ठाकरे यांच्यासह मुंबईच्या पोलीस आयुक्तांना थेट आव्हान दिले होते. अन्वय नाईक आणि त्यांच्या मातोश्री कुमुद नाईक आत्महत्येप्रकरणी गोस्वामी यांना अटक झाली आहे.  

मुंबई पोलिसांच्या गुन्हे गुप्तवार्ता विभागाने घनश्यामसिंह यांनी त्यांच्या घरातून आज सकाळी अटक केली. बनावट टीआरपी प्रकरणी आतापर्यंत एकूण 12 जणांना पोलिसांनी अटक केली आहे. याआधी काही वेळा घनश्यामसिंह यांची चौकशी करण्यात आली होती. सिंह यांच्यामुळे आधीच अडचणीत आलेल्या गोस्वामींच्या अडचणी आणखी वाढण्याची शक्यता आहे. या प्रकरणातही गोस्वामी यांच्यावर कारवाई होऊ शकते. 

टीव्ही वाहिन्यांचा टीआरपी 'बीएआरसी' नावाची संस्था ठरवत असते. 'बीएआरसी'ने हे कंत्राट हंसा या संस्थेला दिले होते. मात्र, हंसा कंपनीतील कर्मचाऱ्यांना हाताशी धरून या तीन वाहिन्यांनी हा गैरप्रकार केल्याचे उघड झाले. जून महिन्यात आरोपींचा यातील सहभाग निश्‍चित झाल्यानंतर दोन कर्मचाऱ्यांना हंसा कंपनीने काढून टाकले होते. या बनावट टीआरपी विरोधात हंसा कंपनीने तक्रार दिल्यानंतर दोन आरोपींची पोलिसांनी चौकशी केली होती. या दोघांनी चौकशीत हे बनावट टीआरपीच्या रॅकेटची कबुली दिली. त्यानुसार मुंबई पोलिसांच्या पथकाने दोघांना अटक केली होती. 

रिपब्लिक टीव्ही बरोबरच फक्त मराठी आणि बॉक्‍स ऑफिस हे दोन चॅनेल्ससुद्धा बनावट टीआरपी प्रकरणात अडचणीत आले आहेत. फक्त मराठी आणि बॉक्‍स ऑफिस चॅनेलच्या मालकांना मुंबई पोलिसांनी अटक केली आहे. मात्र, रिपब्लिक टीव्हीच्या व्यवस्थापनाची चौकशी करून पुढील कारवाई पोलीस करणार आहेत. मुंबईतील तब्बल 1800 घरामध्ये दर महिन्याला 400 ते 500 रुपये देऊन हे चॅनेल्स चालू ठेवावेत, असे सांगण्यात आले होते. टीआरपी वाढवण्यासाठी हा गैरप्रकार करण्यात आला. 

Edited by Sanjay Jadhav 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख