भाजपचे प्रदेशाध्यक्ष अडचणीत; दहा दिवसांत दुसरा गुन्हा दाखल

तिरूअनंतपुरम : केरळ (Kerala) विधानसभा निवडणुकीत (Assembly Election) बहुमत मिळवून पुन्हा डाव्यांची सत्ता आली. परंतु, भाजपला (BJP) राज्यात खातेही खोलता आले नव्हते. भाजपची राज्यात असलेली एकमेव जागाही पक्षाने गमावली. यातच आता केरळचे भाजप प्रदेशाध्यक्ष के. सुरेंद्रन (K.Surendran) अडचणीत आले आहेत. त्यांच्यावर दहा दिवसांत दुसरा गुन्हा दाखल झाला आहे. 

केरळमध्ये विधानसभेच्या एकूण 140 जागांसाठी मतदान झाले होते. डाव्यांच्या लेफ्ट डेमोक्रॅटिक फ्रंटने (एलडीएफ) 90 जागा मिळवून बहुमत मिळवले. काँग्रेसप्रणित युनायटेड डेमोक्रॅटिक फ्रंटला (यूडीएफ) 44 जागा मिळाल्या होत्या. भाजपच्या हाती असलेली एकमेव जागाही पक्षाने गमावली होती. याचवेळी एलडीएफमधील घटक पक्ष असलेल्या राष्ट्रवादी काँग्रेसने दोन जागा मिळवल्या होत्या. 

भाजपचे प्रदेशाध्यक्ष सुरेंद्रन यांच्याविरोधात आता दहा दिवसांत दुसरा गुन्हा दाखल झाला आहे. विधानसभा निवडणुकीवेळी भाजपप्रणित आघाडीत परतण्यासाठी एका आदिवासी नेत्याला पैसे दिल्याप्रकरणी हा गुन्हा दाखल झाला आहे. मुस्लिम स्टुडंट्स फेडरेशनचे नेते पी.के.नावस यांच्या तक्रारीनंतर स्थानिक न्यायालयाने या प्रकरणी गुन्हा दाखल करण्याचे निर्देश दिले होते. एका ऑडिओ क्लिपच्या आधारे हा गुन्हा दाखल करण्यात आला आहे. 

हेही वाचा : मुख्यमंत्री बदलाच्या वादात भाजप नेत्याने थेट मोदींनाच ओढले 

काही दिवसांपूर्वी विधानसभा निवडणुकीत भाजपने पैसे वाटल्याप्रकरणी सुरेंद्रन यांची चौकशी विशेष पथकाद्वारे करण्यात आली होती. विधानसभा निवडणुकीवेळी आदिवासी नेते सी. के. जानू यांच्या पक्षाने राष्ट्रीय लोकशाही आघाडीला (एनडीए) साथ द्यावी, यासाठी त्यांना पैसे पुरविल्याचा आरोप सुरेंद्रन यांनी फेटाळला होते. जानू यांना पैशाचे आमिष दाखविले नाही अथवा त्यांना पैसे दिलेले नाहीत. भाजपची प्रतिमा मलिन करण्यासाठी असे आरोप होत असून, या प्रकरणाच्या चौकशीसाठी भाजप पोलिसांना पूर्णपणे सहकार्य करेल, असा दावा सुरेंद्रन यांनी केला होता.

सुरेंद्रन यांच्यावर आधी प्रतिस्पर्धी उमेदवारीला माघार घेण्यासाठी पैसे दिल्याप्रकरणी गुन्हा दाखल झाला आहे. मांजेश्वरम मतदारसंघातून सुरेंद्रन उभे होते. त्यांनी मायावतींच्या बहुजन समाज पक्षाचे उमेदवार के.सुंदरा यांनी माघार घ्यावी, यासाठी 2.5 लाख रुपये दिले होते.