नवी दिल्ली : राजस्थानमधील बिकानेर येथील मालमत्तेप्रकरणी प्राप्तिकर विभागाच्या अधिकाऱ्यांनी काँग्रेसच्या अध्यक्षा सोनिया गांधी यांचे जावई रॉबर्ट वद्रा यांची सलग दोन दिवशी चौकशी केली. दरम्यान, दुसऱ्या एका प्रकरणात वद्रा यांची सक्तवसुली संचालनालयाकडूनही (ईडी) चौकशी सुरू आहे. यासाठी वद्रा यांनी केंद्रातील मोदी सरकारलाच थेट जबाबदार धरले आहे.
या चौकशीविषयी बोलताना रॉबर्ट वद्रा म्हणाले की, सरकार केंद्रीय यंत्रणांचा गैरवापर करीत आहे. केंद्रातील मोदी सरकार अडचणीत आले की मला लक्ष्य केले जाते. सध्या शेतकरी आंदोलन सुरू आहे. प्रियांका गांधी या शेतकऱ्यांच्या बाजूने बोलत आहेत. त्यामुळे माझ्या विरोधात केंद्रीय यंत्रणांनी कारवाई सुरू केली आहे. असे असले तरी प्रत्येक वेळी मी चौकशीला सहकार्य केले आहे.
दिल्लीतील सुखदेव विहारमधील वद्रा यांच्या निवासस्थानी प्राप्तिकर विभागाचे पथक दाखल झाले होते. त्यांची सलग दोन दिवस चौकशी करण्यात आली होती. सलग दोन दिवस चौकशी केल्यानंतर प्राप्तिकर विभागाच्या अधिकाऱ्यांनी त्यांचा जबाब नोंदवून घेतला होता. याआधी प्राप्तिकर विभागाने वद्रा यांना समन्स बजावले होते मात्र, त्यांनी कोरोनाचे कारण पुढे करत चौकशीला जाणे टाळले होते.
राजस्थानमधील बिकानेर येथे वद्रा यांच्याशी निगडित स्काय लाईट हॉस्पिटॅलिटी कंपनीने जमीन खरेदी केली आहे. सप्टेंबर 2015 मध्ये वद्रा यांच्या स्काय लाईट हॉस्पिटॅलिटी कंपनीच्या विरोधात करचुकवेगिरीचा गुन्हा दाखल करण्यात आला होता. बिकानेर येथील गरीब गावकऱ्यांच्या पुनर्वसनासाठी असलेली जमीन घेतल्याप्रकरणी ही कारवाई करण्यात आली होती. सप्टेंबर 2018 मध्ये हरियाना सरकारने गुडगावमधील जमीन गैरव्यवहार प्रकरणी वद्रा यांच्या विरोधात गुन्हा दाखल केला होता.
वद्रा यांची २०१८ मधील हवाला व्यवहारप्रकरणी देखील सक्तवसुली संचालनालयाकडून (ईडी) चौकशी सुरू आहे. शस्त्रास्त्र दलाल संजय भंडारी याच्या मदतीने वद्रा यांनी ब्रिटनमध्ये मालमत्ता खरेदी केल्याचा संशय आहे. वद्रा यांच्या ब्रिटनमध्ये दोन मालमत्ता आहेत. लंडनमधील ब्रिस्टन स्क्वेअर येथील त्यांच्या मालमत्तेची किंमत १७.७७ कोटी रुपये आहे. वद्रा यांच्या नावे ब्रिटनमध्ये सात फ्लॅट असल्याचा संशय आहे. या प्रकरणी त्यांची मागील काही दिवसांपासून ईडीकडून चौकशी सुरू आहे.
Edited by Sanjay Jadhav
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.