मुंबई : अभिनेता सुशांतसिंह राजपूत मृत्यू प्रकरणात ड्रग्जच्या अँगलचा तपास करणाऱ्या अमली पदार्थ विरोधी विभागाने (एनसीबी) सुशांतची प्रेयसी रिया चक्रवर्ती आणि तिचा भाऊ शौविक चक्रवर्ती यांना अटक केली होती. रिया आणि शौविकच्या न्यायालयीन कोठडीत न्यायालयाने 20 ऑक्टोबरपर्यंत वाढ केली आहे. यामुळे दोघांचा कारागृहातील मुक्काम वाढला आहे. दरम्यान, या दोघांच्या जामिनावरील निर्णय उच्च न्यायालयाने अद्याप राखून ठेवला आहे.
'एनसीबी'कडून रिया आणि तिचा भाऊ शौविक यांची चौकशी झाली होती. ड्रग्ज रॅकेटमध्ये सहभागी असलेल्या बॉलीवूडमधील काही कलाकारांची नावे या दोघांनी उघड केली होती. बॉलीवूडमधील पार्ट्या आणि ड्रग्जची तस्करी यावरही या दोघांनी प्रकाश पाडला होता. या प्रकरणी अभिनेत्री रकुल प्रीत सिंह, सारा अली खान, दीपिका पदुकोण आणि श्रद्धा कपूर यांच्यासह काही जणांची एनसीबीने चौकशी केली आहे.
रियावर अमली पदार्थ प्रतिबंधक कायदा (एनडीपीएस) कलम 8 (सी), 20 (बी), 28 आणि 29 नुसार ड्रग्जचे खरेदी, सेवन, बाळगणे आदी आरोप तिच्यावर ठेवण्यात आले आहेत. रिया ही ड्रग्ज रॅकेटची सक्रिय सदस्य असून, तिने अमली पदार्थांचे सेवन केले आहे आणि ती यातील आर्थिक व्यवहारांमध्येही सहभागी होता, असे एनसीबीने म्हटले आहे.
रियाला एनसीबीने 6 सप्टेंबरला अटक केली होती. तेव्हापासून न्यायालयाने तिची रवानगी न्यायालयीन कोठडीत केली आहे. ती सध्या भायखळा कारागृहात असून, शौविक हा तळोजा कारागृहात आहे. रिया आणि शौविक यांच्या वतीने त्यांचे वकील सतिश मानेशिंदे यांनी उच्च न्यायालयात जामीन अर्ज दाखल केले होते. यावर आज उच्च न्यायालयात सुनावणी झाली. न्यायाधीश एस.व्ही कोतवाल यांनी या प्रकरणी निर्णय राखून ठेवला आहे. लवकरच उच्च न्यायालय निर्णय देणे अपेक्षित आहे. त्यामुळे रिया आणि शौविकला जामिनासाठी काही काळ प्रतीक्षा करावी लागणार आहे.
रिया आणि शौविक यांच्या न्यायालयीन कोठडीची मुदत संपत असल्याने एनसीबीने त्यांना आज न्यायालयात हजर केले. न्यायालयाने दोघांच्या न्यायालयीन कोठडीची मुदत 20 ऑक्टोबरपर्यंत वाढवली आहे. यामुळे दोघांचाही कारागृहातील मुक्काम वाढला आहे. दरम्यान, उच्च न्यायालयाने त्यांच्या जामिनावरील निर्णय राखून ठेवल्याने दोघांना कारागृहातून सुटकेसाठी आता तेवढीच एक आशा आहे.
सुशांत हा 14 जूनला मुंबईतील घरी मृतावस्थेत सापडला होता. याचा तपास मुंबई पोलिस करीत होते. या प्रकरणी पोलिसांनी 56 जणांचे जबाब नोंदविले होते. यात सुशांतचे कुटुंबीय, त्याचे मित्र, अभिनेत्री रिया चक्रवर्ती, कास्टिंग डायरेक्टर मुकेश छाब्रा यांच्यासह इतर काही जणांचा समावेश होता.
Edited by Sanjay Jadhav
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.