रिपब्लिक टीव्हीचा सीएफओ म्हणाला, मी चौकशीस येणार नाही कारण... - republic tv cfo skips mumbai police invetigation in trp scam case | Politics Marathi News - Sarkarnama

रिपब्लिक टीव्हीचा सीएफओ म्हणाला, मी चौकशीस येणार नाही कारण...

वृत्तसंस्था
शनिवार, 10 ऑक्टोबर 2020

बनावट टीआरपी प्रकरणाची व्याप्ती दिवसेंदिवस वाढत आहे. या प्रकरणी मुंबई पोलिसांकडून रिपब्लिक टीव्हीच्या सीएफओची चौकशी होणार आहे. 

मुंबई : बनावट टीआरपी प्रकरणी गुन्हे शाखेने रिपब्लिक टीव्हीचे मुख्य वित्तीय अधिकारी (सीएफओ) शिवा सुब्रह्मण्यम सुंदरम यांना चौकशीसाठी समन्स बजावले होते. त्यानुसार आज सकाळी 11 वाजता त्यांना गुन्हे शाखेच्या कार्यालयात उपस्थित राहण्यास सांगितले होते. परंतु, सुंदरम यांनी चौकशीला हजर राहण्यास नकार दिला असून, यासाठी वेगळेच कारण पुढे केले आहे. 

मुंबई पोलिसांनी नुकतेच बनावट टीआरपी मिळवण्याबाबतचे रॅकेट उद्‌ध्वस्त केले. त्यात रिपब्लिक भारत, फक्त मराठी आणि बॉक्‍स सिनेमा या तीन चॅनेल्सचा समावेश होता. त्यांनी बनावट पद्धतीने टीआरपी मिळवल्याचे समोर आले आहे. टीव्ही वाहिन्यांचा टीआरपी 'बीएआरसी' नावाची संस्था ठरवत असते. 'बीएआरसी'ने हे कंत्राट हंसा या संस्थेला दिले होते. मात्र, हंसा कंपनीतील कर्मचाऱ्यांना हाताशी धरून या तीन वाहिन्यांनी हा गैरप्रकार केल्याचे उघड झाले. 

जून महिन्यात आरोपींचा यातील सहभाग निश्‍चित झाल्यानंतर दोन कर्मचाऱ्यांना हंसा कंपनीने काढून टाकले होते. या बनावट टीआरपी विरोधात हंसा कंपनीने गुन्हा नोंदवल्यानंतर दोन आरोपींना काल चौकशीसाठी बोलावले होते. या दोघांनी चौकशीत हे बनावट टीआरपीच्या रॅकेटची कबुली दिली. त्यानुसार मुंबई पोलिसांच्या सीआयूच्या पथकाने दोघांना अटक केली होती. 

रिपब्लिक टीव्ही बरोबरच फक्त मराठी आणि बॉक्‍स ऑफिस हे दोन चॅनेल्ससुद्धा बनावट टीआरपी प्रकरणात अडचणीत आले आहेत. फक्त मराठी आणि बॉक्‍स ऑफिस चॅनेलच्या मालकांना मुंबई पोलिसांनी अटक केली आहे. मात्र, रिपब्लिक टीव्हीच्या व्यवस्थापनाची चौकशी करून पुढील कारवाई पोलीस करणार आहेत. मुंबईतील तब्बल 1800 घरामध्ये दर महिन्याला 400 ते 500 रुपये देऊन हे चॅनेल्स चालू ठेवावेत, असे सांगण्यात आले होते. टीआरपी वाढवण्यासाठी हा गैरप्रकार करण्यात आला. 

याप्रकरणी गुन्हे शाखेने रिपब्लिक टीव्हीचे सीएफओ सुंदरम यांना आज गुन्हे शाखेच्या कार्यालयात उपस्थित राहण्यासाठी समन्स पाठवले आहे. याशिवाय रिपब्लिकसाठी काम करणाऱ्या दोन जाहिरात कंपन्यांनाही गुन्हे शाखेने समन्स बजावले आहे. तसेच, बॉक्‍स सिनेमा व फक्त मराठी या वाहिन्यांच्या अधिकाऱ्यांनाही गुन्हे शाखेने समन्स बजावले आहे. 

सुंदरम यांनी आज चौकशीसाठी गुन्हे शाखेसमोर हजर राहण्यास नकार दिला आहे. त्यांनी यासाठी सर्वोच्च न्यायालयात दाखल केलेल्या याचिकेसह इतर काही कारणे दिली आहेत. त्यांनी म्हटले आहे की, मुंबई पोलीस या प्रकरणात माझ्या विरोधात पुढील कारवाई करु शकत नाहीत.  माझ्या काही पूर्वनियोजित बैठका मुंबईबाहेर आहेत. त्यामुळे मी 14 -15 ऑक्टोबरला चौकशीसाठी हजर राहू शकेन. 

Edited by Sanjay Jadhav 

अधिक राजकीय बातम्यांसाठी सरकारनामा अॅप डाऊनलोड करा
Play Store    App Store

संबंधित लेख