रविंद्र जाडेजासमोर धर्मसंकट; बायको भाजपची उमेदवार अन् बहीण काँग्रेसची प्रचारक

Ravind Jadeja News : गुजरात विधानसभेसाठी राजकीय वातावरण चांगलेच तापले आहे. मात्र, या राजकीय वातवरणात अडकला आहे तो भारतीय क्रिकेट संघाचा खेळाडू रविंद्र जाडेजा. रविंद्र जाडेजाची (Ravindra Jadeja) पत्नी रीवाबा जाडेजाला भाजपने उमेदवारी दिली आहे. ज्यानंतर जाडेजाच्या घरात मोठा ट्विस्ट निर्माण झाला आहे.

भाजपने (BJP) रीवाबा यांना जामनगर मतदार संघातून मैदानात उतरवले आहे. रीवाबा 2019 पासून भाजपचे काम करतात. मात्र, रीवाबा यांच्यासमोर त्यांची सख्ख्यी नणंद नैना जाडेजाचे मोठे आव्हान आहे, ज्या काँग्रेसच्या स्टार प्रचारक आहे. नैना जाडेजा या गुजरात महिला काँग्रेसच्या (Congress) महामंत्री व जामनगर मतदार संघातील पक्षाच्या स्टार प्रचारक आहेत. आता रिवाबा जाडेजा उमेदवार आहेत तिथेच नैना जाडेजा काँग्रेस उमेदवारासाठी दिवसरात्र प्रचार करत आहेत. जामनगरच्या जागेवरुन नणंद-भावजयीचा संघर्ष निर्माण झाला आहे.

जामनगरमध्ये धर्मेंद्रसिंह जाडेजा यांचा चांगलाच प्रभाव आहे. मात्र, 2012 च्या विधानसभा निवडणुकीत त्यांना भाजपने तिकीट दिले नाही. त्यानंतर त्यांनी काँग्रेसकडून निवडणूक लढवली. 2017 मध्ये त्यांना भाजपने उमेदवारी दिली आणि ते पुन्हा निवडून आले. यंदा मात्र भाजपने त्यांचे तिकीट कापले आहे.

मात्र, आता खरी अडचण झाली ती रविंद्र जाडेजाची कारण बायकोचा प्रचार करायचा की बहिणीचा? आता या राजकीय गुगलीवर जाडेजा षटकार मारणार की आऊट होणार याकडे सर्वांचे लक्ष लागले आहे. मात्र, या राजकीय परिस्थिताली सामोरे जाताना जाडेजाची चांगलीच तारंबळ उडाली आहे.