Rahul Gandhi : '२०२४ च्या निवडणुकीत राहुल गांधीच असतील पंतप्रधान पदाचा चेहरा'

Rahul Gandhi News : काँग्रेसचे ज्येष्ठ नेते कमलनाथ यांनी मोठं विधान केलं आहे. २०२४ च्या लोकसभेच्या निवडणुकीमध्ये काँग्रेसचे नेते आणि खासदार राहुल गांधी हे पंतप्रधान पदाचा चेहरा असतील असं त्यांनी म्हटलं आहे. तसेच त्यांनी राहुल गांधींनी भारत जोडो यात्रेमध्ये केलेल्या नेतृत्वाचेही कौतुक केले. कमलनाथ हे एका मुलाखती दरम्यान बोलत होते. त्यांच्या या विधानाची राजकीय वर्तुळात जोरदार चर्चा होत आहे.

कमलनाथ म्हणाले, ''राहुल गांधी सत्तेचे राजकारण करत नाहीत तर ते जनतेचे राजकारण करतात. भारत जोडो यात्रेत राहुल गांधी यांनी जे नेतृत्व केलं त्यांच्या या नेतृत्वाचं सर्वांनी कौतुक केलं. २०२४ च्या लोकसभा निवडणुकीत राहुल गांधी फक्त विरोधकांचा चेहरा नसून ते पंतप्रधानपदाचा चेहरा असतील, असं कमलनाथ यांनी सांगितलं आहे.

''राहुल गांधी हे नेहमी जनतेचे राजकारण करतात. अशा नेत्याला देशातील जनता आपोआप सिंहासनावर बसवेल. जगाच्या इतिहासात कोणत्याही व्यक्तीने ३५०० किलोमीटर पेक्षा जास्त पायी चालत प्रवास केलेला नाही. भारत देशासाठी जेवढे हौतात्म्य गांधी घराण्याने दिले तेवढे कोणत्याही कुटुंबाने दिलेले नाही'', असं ते म्हणाले.

''भारत जोडो यत्रेला सर्व राज्यात जोरदार पाठिंबा मिळाला. तसेच मध्य प्रदेशात भारत जोडो यात्रेने सर्व विक्रम मोडीत काढले आहेत. राजस्थान आणि दिल्लीतही राहुल गांधींची यात्रा किती लोकप्रिय होत आहे हे सर्वांनी पाहिले आहे. मध्य प्रदेशमध्ये काँग्रेसचे कार्यकर्ते आणि सामान्य जनतेसह तरुणांनी मोठ्या प्रमाणात सहभाग घेतला'', असं ते म्हणाले.

दरम्यान, येणाऱ्या २०२४ च्या लोकसभा निवडणुकीबाबत काँग्रेसच्या कोणत्याच नेत्याने आत्तापर्यंत काही स्पष्टीकरण दिलं नव्हतं. मात्र पहिल्यांदाच काँग्रेसचे ज्येष्ठ नेते कमलनाथ यांनी २०२४ च्या लोकसभा निवडणुकीतबाबत आणि काँग्रेसकडून (Congress) पतंप्रधान पदाचा चेहरा कोण असेल? याबाबत मोठं विधान केलं आहे.