आधी घेरले नंतर उचलून ताब्यात घेतले; राहुल गांधींवर पोलिसांची कारवाई

नवी दिल्ली : काँग्रेसच्या अध्यक्षा सोनिया गांधी (Sonia Gandhi) यांची ईडी (ED) चौकशी सुरु आहे. याविरोधात काँग्रेसकडून (Congress) देशभरात आंदोलन केले जात आहे. राजधानी दिल्लीमधील आंदोलनात सहभागी झालेले राहुल गांधी (Rahul Gandhi) यांच्यावर पोलिसांनी कारवाई केली. त्यांना पोलिसांनी आधी घेरले नंतर त्यांना ताब्यात घेण्यात आले. याआधी २१ जुलैला ईडीने सोनिया गांधींची दोन तास चौकशी झाली होती. (Rahul Gandhi Latest Marathi News)

'नॅशनल हेराल्ड' प्रकरणात गेल्या महिन्यात राहुल गांधी यांच्यानंतर सोनिया गांधी यांना 'ईडी'ने चौकशीसाठी बोलावले होते. मात्र, सोनिया गांधी यांना कोरोनाची लागण झाल्याने त्यांची चौकशी लांबली होती. राहुल गांधी राजपथ मार्गावर रस्त्यावर बसून आंदोलन करत होते. त्यावेळी पोलिसांनी त्यांना घेरले. तपास यंत्रणांकडून विरोधी पक्षातील नेत्यांना लक्ष्य केले जात असल्याविरोधात तसेच महागाई, जीएसटी अशा अनेक मुद्द्यांवर राहुल यांनी आंदोलन केले. रस्त्यावर बसुन जवळपास राहुल गांधी अर्धा तास आंदोलन करत होते. यानंतर पोलिसांनी त्यांना उचलून ताब्यात घेतले व इतर नेत्यांसोबत बसमधून नेले.

यावेळी राहुल गांधी यांनी पंतप्रधान नरेंद्र मोदी राजे असून, देशात पोलिसांचे राज्य आहे, अशी टीका केली. पोलिसांनी आंदोलनानंतर सर्व कार्यकर्त्यांवर कारवाई केली. त्यानंतर राहुल गांधी एकटेच होते. त्यांच्यावर कारवाई करायची की नाही याबाबत पोलिसांमध्ये चर्चा सुरु होती.

दरम्यान, दुसरीकडे ईडीकडून सोनिया गांधी यांची चौकशी सुरु आहे. याआधी एकदा त्यांची चौकशी करण्यात आली आहे. ही दुसरी फेरी आहे. सोनिया गांधींसोबत प्रियंका गांधींदेखील ईडी कार्यालात पोहोचल्या आहेत. आंदोलनात सहभागी होण्याआधी राहुल गांधीदेखील ईडी कार्यालयात पोहोचले होते.