इस्लामाबाद : इम्रान खान (Imran Khan) यांची पाकिस्तानचे (Pakistan) पंतप्रधान पदावरुन पायउतार झाले आहेत. त्यांच्याविरोधातील अविश्वास प्रस्ताव रविवारी मध्यरात्री १ वाजता मतदान होवून मंजूर झाला आहे. ३४२ सदस्य संख्या असलेल्या पाकिस्तानच्या नॅशनल असेंब्लीमध्ये (National Assembly) १७२ ही बहुमताची मॅजिक फिगर आहे. यात इम्रान खान यांच्या विरोधात संयुक्त विरोधी पक्षाला १७४ मत पडली. त्यामुळे विरोधी पक्षाने यापूर्वीच घोषित केल्यानुसार आता पाकिस्तान मुस्लिम लीग नवाजचे अध्यक्ष शहाबाज शरीफ (Shahabaj Sharif) हे पाकिस्तानचे नवे पंतप्रधान होणार आहेत. रविवारी त्यांची निवड होवू शकते.
इम्रान खान सरकारवरील अविश्वास ठरवावरील मतदानापूर्वी पाकिस्तानच्या राजकारणात अनेक नाट्यमय घडामोडी घडल्या. काही दिवसांपूर्वी इम्रान खान सरकार धोक्यात आल्याचा दावा केला गेला होता. यानंतर इम्रान खान यांची बलूचिस्तानमधील जम्हूरी वतन या मित्रपक्षाने देखील साथ सोडली. यानंतर पक्षाचे प्रमुख आणि सरकारमधील कॅबिनेट मंत्री शाहजान बुग्ती (Shahjan Bugti) यांनी राजीनामा दिला. यानंतर पीएमएलएन पक्षाच्या नेत्या मरियम औरंगजेब यांनी विरोधकांना १७४ खासदारांचे समर्थन असल्याचा दावा केला होता. मतदानाआधी विरोधकांच्या बैठकीत १७७ खासदारांनी हजेरी लावल्याचा दावाही केला जात होता.
त्यामुळे मार्च महिन्याच्या शेवटच्या आठवड्यामध्येच इम्रान खान यांच्याविरोधात अविश्वास प्रस्ताव आणण्याची तयारी सुरु झाली होती. यावर ३ एप्रिल रोजी मतदान होणार होते. यात त्यांची सत्ता जाणार, अशीच चर्चा सर्वत्र होती. पण प्रत्यक्षात या ठरावावर कामकाज सुरू झाल्यानंतर असेंब्लीच्या उपसभापतींनी परकीय शक्तींचा वापर करून पाकिस्तानमध्ये राजकीय अराजकता निर्माण करण्याचा प्रयत्न केला जात असल्याचे सांगत हा ठराव फेटाळून लावला होता. त्यानंतर इम्रान खान यांनी पाकिस्तानची नॅशनल असेंब्लीच बरखास्त करण्यीची शिफारस केली. त्यामुळे पाकिस्तानमध्ये नव्याने निवडणुका जाहिर होणार होत्या.
मात्र विरोधकांनी इम्रान खान यांचा हा निर्णय घटनाबाह्य असल्याचे सांगत न्यायालयात धाव घेतली होती. यात न्यायालयाने देखील विरोधकांच्या बाजूने निकाल देत संसद बरखास्तीचा निर्णय रद्द करुन अविश्वास ठरावावर मतदान घेण्याचे आदेश दिले. यानंतर शनिवारी या अविश्वास प्रस्तावावर मतदान घेण्याचे ठरले. त्यानुसार शनिवारी-रविवारी मध्यरात्री अविश्वास प्रस्तावावर मतदान होवून इम्रान खान सरकारवरील अविश्वास प्रस्ताव मंजूर झाला असून पाकिस्तान मुस्लिम लीग नवाजचे अध्यक्ष शहाबाज शरीफ हे पाकिस्तानचे नवे पंतप्रधान होणार आहेत. रविवारी त्यांची निवड होवू शकते.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.
